DILI, 17 janeiru 2024 (TATOLI)—Governu liuhosi reuniaun ordinária Konsellu Ministru (KM), kuarta ne’e, aprova akordu rua entre Repúblika Demokrátika Timor-Leste no Repúblika Sosialista Vietname, ne’ebé aprezenta hosi Vise-Ministra ba Asuntu ASEAN, Milena Maria da Costa Rangel.
“Akordu rua ne’e kona-ba izensaun vistu ba titulár pasaporte ordináriu no ba titulár pasaporte diplomátiku no servisu,” Ministru Prezidénsia Konsellu Ministru, Agio Pereira, relata hafoin reuniaun ezekutivu, iha Palásiu Governu.
Notísia relevante : Dirijente sira ME sei partisipa formasaun hodi responde ba Programa Futuru Líder ASEAN
Akordu hirak ne’e ho objetivu atu hametin relasaun amizade entre país rua no sei fasilita viajen sidadaun sira ba objetivu turístiku.
“Haree ba prosesu adezaun Timor-Leste nian ne’ebé la’o hela, nu’udar membru ba da-11, no ninia estatutu observadór iha Simeira ASEAN, deliberasaun ida-ne’e hakarak atu aliña ho dispozisaun Akordu Turizmu ASEAN no Roteiru Adezaun Repúblika Demokrátika Timor-Leste,” Ministru akresenta.
Nune, objetivu mak atu promove turizmu ho efetivu iha rejiaun no hametin lasu amizade entre sidadaun ASEAN nian, no hatudu kompromisu Timor-Leste hodi implementa no respeita instrumentu ASEAN hotu, inklui akordu kuadru kona-ba izensaun vistu.
Jornalista : Antónia Gusmão
Editora : Julia Chatarina
