INFPM aloka millaun $4.2 atu sosa aimoruk
DILI, 22 janeiru 2024 (TATOLI)–Diretór Ezekutivu Institutu Nasionál Farmásia Produtu Medikamentu (INFPM), Brigído Simão Dias de Deus, hateten iha tempu badak ne’e INFPM sei aloka orsamentu millaun $4.2 atu sosa aimoruk.
Notísia Relevante: Pozisaun Sali-Magu ba akizisaun medikamentu
Aimoruk sira-ne’e konstitui hosi pakote sira hanesan konsumivel mak hanesan reajentes, luvas, seringa no pakote aimoruk vital, nesesaria no esensiál mak hanesan aimoruk injeksaun no tablet.
“Konkursu sei loke iha semana ida-ne’e nia laran no diretór aprovizionamentu haree los ona. Produtu kímiku sira hanesan aimoruk sira-ne’e sei sosa ho osan millaun $4.2,” nia hateten ba Agência Tatoli liuhosi programa Ëntrevista Eskluzivu” iha estúdiu Tatoli, Faról, segunda ne’e.
Akizisaun aimoruk ba agora ne’e preve atu empreza halo akizisaun no sei to’o iha Timor-Leste iha fulan-abril, atu susbtitui aimoruk sira-ne’ebe to’o iha semana kotuk ka hola iha dezembru 2023 ne’e.
Produtu aimoruk sira-ne’ebé empreza sira halo akizisaun ne’e iha prazu durasaun mínimu fulan 18 hodi garante durasaun ba uzu ba produtu.
Nia garante katak akizisaun foun ho millaun $4.2 ba produtu sira-ne’e sei rezolve aimoruk stock out iha Hospital Nasionál no referral, postu saúde no sentru saúde sira iha territóriu nasionál.
INFPM sosa ona aimoruk iha dezembru nia laran ho orsamentu hamutuk rihun $200 ba reajentes no to’o ona iha Timor-Leste iha semana kotuk.
“Iha meadu dezembru, ami uza osan rihun $200 hodi halo kompras aimoruk lubuk ida mak tama mai no reajentes vitros 100 item hodi bele rezolve nesesidade laboratóriu ba fulan tolu mai,” nia dehan.
Notísia Relevante: SAMES: Akizisaun ba aimoruk 2023 sei iha prosesu
Jornalista : Jesuína Xavier
Editór : Cancio Ximenes
