OÉ-CUSSE, 24 janeiru 2024 (TATOLI) – Eskola Sekundáriu Jerál (ESG, sigla portugés) Baqui, kuarta ne’e dezevolve fali osan matríkula ho montante $1.030 ba inan-aman estudante 206, hodi kumpri sirkulár ne’ebé fó-sai hosi Ministériu Edukasaun atu labele halo kobransa ba esudante sira.
“Tanba antes sirkulasaun ne’e sai, liuhosi ami-nia regra eskola nian halo kada tinan, ami kobra osan, maibé halibur ona antes, entaun agora ami tenke devolve fila-fali atu kumpri sirkulár ne’e,” Diretór ESG Baqui, Domingos Ramos Anunu, ko’alia iha ESG Baqui.
Notísia relevante: ME mak sei prepara uniforme ba alunu eskola públika sira
Domingos Ramos Anunu, informa, osan hirak-ne’e rekolla hosi estudante 206 kada estudante kontribui $5,00 ho montante $1,030.00 atu uza ba nesesidade eskola nian.
Maibé tinan ne’e hosi eskola la hala’o orientasaun fíziku ba estudante sira, só orientasaun akadémika de’it, no estudante sira la lori atributu seluk.
“Ne’e mak tinan ne’e hosi inan-aman akordu halo kontribuisaun $5,00, osan hirak-ne’e planu inan-aman ho eskola atu halo lutu hola bebak, hola ai, pregu no au, atu halo lutu iha eskola no $1 ba matríkula nian,” nia informa.
Diretór Edukasaun Oé-Cusse, Daniel Mauno, informa, asaun ne’e foin maka implementa iha ESG Baqui, no daudaun ne’e servisu inspesaun kontinua identifika tán eskola seluk atu kumpri.
“Konkordánsa ho inan-aman hamutuk ho inspetór eskolár, entaun ohin konkorda devolve fali osan ne’e, ita mai asiste serimónia devolve fila-fali osan ne’e, tanba asaun ne’e foin maka primeira vez, halo iha EGS Baqui, ita sei hein tán, servisu inspesaun sira atu haree no verifika eskola sira-ne’ebé mak antes ne’e konsege rekolla ona,” nia katak.
Reprezentante inan-aman, Maria Filomena Teme, nu’udar inan-aman, kumpri de’it saida maka eskola hato’o, antes ne’e iha ona konkordánsa entre eskola no inan-aman sira.
“Osan ne’e la’ós eskola mk obriga ami, maibé ne’e konkordánsa entrea inan-aman ho eskola, tanba ita-nia oan sira sei kiik, entaun ita kontribui osan hanesan ne’e hodi hamenus servisu, sei ita la kontribui entaun mak sei lori sasán atu halo lutu.”
Entretantu, totál estudante iha Eskola Sekundáriu Jerál Baqui hamutuk 631, ho totál profesór hamutuk na’in-28, permanente na’in-19, kazuál na’in-tolu no kontratadu na’in-neen.
Notísia relevante: Edukasaun Oé-Cusse sei identifika eskola ne’ebé kobra osan matríkula
Jornalista: Abílio Elo Nini
Editór: Evaristo Soares Martins
