Deputadu Natalino-Antoninho eleitu ba membru Konsellu Fiskalizasaun SNI
DILI, 05 fevereiru 2024 (TATOLI)—Parlamentu Nasionál (PN) liuhosi reuniaun plenária, segunda ne’e, liuhosi eleisaun eskrútinu ba lista únika hili Deputadu Natalino dos Santos (CNRT) ho Antoninho Bianco (FRETILIN) eleitu ba membru Konsellu Fiskalizasaun Sistema Nasionál Intelejénsia (SNI) ho votu afavór 56, kontra ida (1) no abstensaun zero.
“Hodi nune’e, fica já representado dos Deputadu Antoninho Bianco ho Deputadu Natalino dos Santos,” Prezidente Parlamentu Nasionál, Maria Fernanda Lay, hateten iha sala plenária PN.
Nia hateten, tempu badak meza Parlamentu Nasionál (PN) sei organiza toma pose ba membru konsellu foun na’in-rua (2) ne’e.
Tuir karta ne’ebé sekretária meza Parlamentu Nasionál (PN), Deputada Virginia Ana Belo, lee sai iha plenária ba asuntu nomeasaun membru Konsellu Fiskalizasaun Sistema Nasionál Intelejénsia (SNI) hosi bankada CNRT no FRETILIN konforme mandatu membru Konsellu Fiskalizasaun SNI, hosi PN ramata ona iha dezembru 2023 no konsidera importánsia hosi papél konsellu nian tuir artigu 7 lei númeru 9/2008, 2 jullu, nune’e presiza PN atu indika Deputadu na’in-rua (2) ne’ebé iha efetividade funsaun.
Ho nune’e, nomea ida Deputadu Natalino dos Santos Nacimento hosi bankada CNRT no Deputadu Antoninho Bianco, hosi bankada FRETILIN hodi tuir prosesu votasaun.
Iha deklarasaun karta aseitasaun husi kandidatu sira katak, aseita nomeasaun hosi PN hodi sai kandidatu ba membru Konsellu Fiskalizasaun SNI, hanesan Deputadu iha kapasidade própriu hodi asume papél membru Konsellu Fiskalizasaun SNI, ne’ebé iha koñesimentu no esperiénsia serbisu iha área seguransa no área intelijénsia iha tempu naruk.
No komprometidu hala’o kna’ar ho profisionál ba seguransa interna hodi konsolida Estadu direitu demokrátika no salvaguarda indepedénsia no soberania Estadu.
Jornalista : Nelson de Sousa
Editór : Cancio Ximenes
