DILI, 06 fevereiru 2024 (TATOLI)–Governu liuhosi reuniaun Konsellu Ministru (KM) aprova ona projetu dekretu-lei, ne’ebé aprezenta hosi Vise-Primeiru Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, hodi kria Gabinete Apoiu ba Sosiedade Sivíl (GASC).
“Gabinete Apoiu ba Sosiedade Sivíl sei troka Servisu Apoiu ba Sosiedade Sivíl no Auditoria Sosiál, ho hanoin katak hafoin tinan-ida hosi vijénsia dekretu-lei númeru 25/2021, ne’ebé define ninia natureza no organizasaun, iha nesesidade atu ajusta diploma ne’e relasiona ho funsionamentu, klarifika sé maka benefisiáriu hosi apoiu hirak ne’e no hodi halo alterasaun balun iha nível organizasaun interna serbisu nian,” Vise-Ministru Asuntu Parlamentár, Adérito Hugo da Costa, hateten liuhosi komferénsia imprensa, hafoin reuniaun ezekutivu, iha Palásiu Governu, tersa ne’e.
Governu nota katak durante ne’e maski Servisu Apoiu ba Sosiedade Sivíl no Auditoria Sosiál hetan autonomia administrativa no finanseira, no iha tempu hanesan hakruuk ba iha podér diresaun Primeiru-Ministru nian, maibé la tuir espetativa Governu nian, ladún lais no ninia kapasidade atu hatán ba pedidu ne’ebé dirije ba sira menus.
Notísia relevante : SASCAS: Sosiedade Sivil sai ponte liga komunidade nia preokupasaun ba Governu
Diploma ida-ne’e, hakarak mós atu konsentra iha diploma únika ida apoiu nian ne’ebé Estadu fó ba organizasaun oin-oin sosiedade sivíl nian, inklui Konferénsia Episkopál Timorense, ne’ebé apoiu simu uluk la tama iha ámbitu programa ida-ne’e nian.
Nune’e, GASC nu’udar servisu públiku sentrál administrasaun direta Estadu nian, ne’ebé iha autonomia administrativa, iha diresaun no supervizaun Ministru Koordenadór Asuntu Sosiál ninia okos, ne’ebé responsável hodi fó apoiu tékniku no administrativu ba Ministru Koordenadór Asuntu Sosiál, ne’ebé hala’o knaar hodi tulun Primeiru-Ministru iha koordenasaun ba ezekusaun polítika ba área governasaun sosiál kona-ba fortalesimentu instituisionál no apoiu ba organizasaun sosiedade sivíl.
“Hosi ninia atribuisaun sira inklui aprova revizaun ba programa apoiu ba organizasaun sosiedade sivíl, autoriza despeza no subvensaun públika, nune’e mós koordena hodi ezekuta polítika ba fortalesimentu instituisionál no apoiu ba organizasaun sosiedade sivíl. Gabinete Apoiu ba Sosiedade Sivíl sei dirije hosi koordenadór ida no sei hetan tulun hosi Adjuntu Koordenadór ida,” Adérito akresenta.
Antes ne’e, iha mandatu VIII nian, ezekutivu sira liuhosi reuniaun Konsellu Ministru aprova projetu dekretu-lei atu kria Servisu Apoiu ba Sosiedade Sivil no Auditoria Sosiál (SASSAS).
Ho aprovasaun ba dekretu-lei ne-e, halakon Gabinete Apoiu ba Sosiedade Sivil no Unidade Auditoria Sosiál, hosi Gabinete Primeiru-Ministru sei transforma ba Servisu Apoiu ba Sosiedade Sivil no Auditoria Sosiál, hanesan mós servisu sentrál ida ba administrasaun direta Estadu nian, ho autonomia administrativa no finanseira hodi garante kapasidade resposta ho lalais ba servisu administrasaun públika nian, ne’ebé responsável atu hatan ba solisitasaun sira ne’ebé mai hosi organizasaun sira sosiedade sivíl nian.
SASSAS dirije hosi Diretór Ezekutivu ida, tuir ierarkia subordina ba Primeiru-Ministru no koadjuva hosi Diretór Adjuntu ida ba subvensaun públika sira no Diretór Adjuntu ba Administrasaun no Finansa.
Jornalista : Antónia Gusmão
Editora : Julia Chatarina
