DILI, 15 fevereiru 2024 (TATOLI)—Deputada hosi Partidu Demokrátiku (PD), Maria Teresa Gusmão, sujere Ministériu Transporte no Komunikasaun (MTK) atu altera lei kódigu estrada hodi fasilita ba sidadaun motorista analfabetu hodi trata karta kondusaun.
Iha rejiaun Baucau ne’ebé kobre Lospalos no Viqueque, parese iha munisípiu hotu ne’ebé iha lei diploma ministeriál kódigu estrada númeru 120/2006 hateten katak, motorista ne’ebé lahatene lee no hakerek labele hetan karta kondusaun. Nune’e, diretór transporte komunikasaun Baucau ne’ebé kobre mós Viqueque no Lospalos husu atu se bele altera tiha artigu no hamosu fali dekretu-lei foun ruma, para bele fó dalan ba sidadaun motorista alfabetu.
“Ho razaun, sidadaun ho maiória veteranu nia oan sira-ne’ebé uluk labele ba eskola, uluk hetan persegisaun nia laran, konsekuénsia husi inan-aman ou família iha ai-laran ou halo klandestina, nune’e sira labele ba eskola,” Deputada PD ne’e hateten iha uma fukum Parlamentu Nasionál (PN).
Reprezentante povu ne’e hateten, lei ida-ne’e tenke proteje sidadaun timoroan hotu-hotu ne’ebé iha direitu atu hetan, no opsaun ne’ebé Dirasaun Nasionál Transporte Terrestre (DNTT) halo mak sira hakarak atu hanorin sinál tránzitu nian hodi maluk alfabetu hatene, atu bele hetan karta kondusaun ou meiu ida mak hanehan liman bainhira lei ne’e bele fó dalan atu maluk alfabetu sira bele hetan karta kondusaun.
Alíende ne’e, Deputada Teresa hato’o katak iha mós transporte komunikasaun rejionál Baucau iha de’it funsionáriu públiku na’in haat, Viqueque na’in-ida (1) no Lospalos funsionáriu na’in-rua (rua). Estrutura hotu-hotu laiha no estrutura iha de’it mak diretór, sira rasik iha duni estrutura hodi fasilita serbisu maibé laiha saláriu komesa hosi 2005 até agora.
“Nu’udar proposta ida hosi munisípiu atu estabelese estrutura ho nível salariál, maibé laiha resposta to’o agora, nune’e prezudika tebes kualidade serbisu transporte nian,” nia dehan.
Tuir mai, iha parte transporte mós laiha atu monta sinál tránzitu, hanoin sinál tránzitu importante tebes fasilita ema barak ninia vida, maibé sira laiha kareta no laiha orsamentu atu fasilita monta sinál sira.
“Dalabarak osan ne’ebé administrasaun transporte (rekolla) direta, sira enkamiña hotu ba Ministériu Finansa. Sira sujere, se bele tau netik rahun ruma ba sira para sira bele uza, nune’e bele halo manutensaun no karreta munisípiu sira ne’e mós laiha atu halo movimentu,’’ nia dehan.
Nune’e, Deputadu hosi bankada Governu ne’e husu ministériu tutela atu tau atensaun ba preokupasaun refere.
Jornalista : Nelson de Sousa
Editór : Cancio Ximenes
