OÉ-CUSSE, 26 fevereiru 2024 (TATOLI) – Sekretáriu Rejionál ba Asuntu Administrasaun, segunda ne’e hatuur fatuk dahuluk ba kontrusaun moru metru-300 iha Eskola Báziku Filiál (EBF) 28 Agostu, nu’udar Programa Nasionál Dezenvolvimentu Suku (PNDS) regulár períodu 2023-2024 ba siklu 5 no siklu 6 iha aldeia Oésono, suku Costa, sub-rejiaun pante Makasar iha Rejiaun Administrativa Espesiál Oé-Cusse Ambeno (RAEOA).
Notísia relevante: PNDS Oé-Cusse sei ezekuta rihun $930-resin atu finansia programa 16
Sekretáriu Rejionál ba Asuntu Administrasaun, Andre La’o, rekomenda ba PNDS atu promove kooperasaun di’ak ho autoridade lokál sira, nune’e obra ne’ebé konstrui iha suku la’o ho transparánsia no kualidade.
“Ohin iha hahú lansa ba implementasaun PNDS iha 2024, ha’u husu ba PNDS liuliu tékniku sira, atu servisu hamutuk ho autoridade lokál sira, jestór, xefe suku no aldeia sira, nune’e ita hala’o dezenvolvimentu ne’e transparánsia haree ba kualidade, lalika haree ba nia kuantidade, tanba ita hakarak harii iha komunidade presiza kualidade,” nia husu.
Notísia relevante: PNDS Oé-Cusse realiza formasaun iha área tolu mellora servisu iha baze
Reprezentante Sekretária Ezekutiva PNDS Nasionál, Dulce de Jesus Juniór, hateten, lansamentu ne’e hahú uluk iha Pante Makasar, tuir mai kontinua ba sub-rejiaun tolu seluk; Oésilo, Pássabe no Nítibe.
Nia hateten, objetivu hosi lansamentu ne’e atu hahú ona implementasaun programa PNDS 2014 nian iha Pante Makasar, ho projetu sira-ne’ebé suku sira identifika liuhosi sira-nia planeamentu no prioridade.
“Tan ne’e iha suku Costa, tau prioridade ba moru haleu eskola, ha’u hanoin iha prioridade diferente, ita haree ba setór hotu-hotu; estrada, eskola, edukasaun, saúde, agrikultura, ida-ne’e depende ba suku sira-nia prioridade hato’o mai, ita la haree de’it ba eskola maibé depende ba prioridade komunidade sira deside atu atu halo saida iha suku,” nia ko’alia iha lansamentu ne’e.
Iha biban hanesan, Xefe suku Costa, Francisco Colo, sei alerta ba ekipa Ekipa Jestaun Suku (EJS) no PNDS atu asegura servisu sira, tanba uza osan Estadu tenke tau atensaun servisu ho kualidade.
Imajen Tatoli/ Abílio Elo Nini.
“Iha suku Costa iha tinan ne’e implementa servisu hosi PNDS maka tau prioridade ba moru tanba ita-nia oan sira barak eskola iha-ne’e ho idade minoridade mínimu, entaun ita tenke kuida duni, tanba iha área ne’e vila, sira-nia movimentu ne’e ita tenke kuidade ho movimentu transporte, tán ne’e maka prioridade mai hosi komunidade Costa katak, tau netik moru iha eskola ida-ne’e,” nia orgullu.
Notísia relevante: MAE sensibiliza matadalan ezekusaun projetu PNDS 2024 iha Oé-Cusse
Entretantu, totál orsamentu ba kontrusaun moru haleu eskola EBF 28 Agostu, hamutuk $46,256.06, ezekuta hosi EJS hamutuk no komunidade sira, ho durasaun serviu fulan rua, hahú 26 fevereiru to’o 26 abríl 2024.
Jornalista: Abílio Elo Nini
Editór: Evaristo Soares Martins
