iklan

HEADLINE, KAPITÁL

Lixu sei domina sidade Dili tanba menus konsiénsia

Lixu sei domina sidade Dili tanba menus konsiénsia

Karreta tula lixu

DILI, 26 fevereiru 2024 (TATOLI)—Diretór Servisu Munisipál Água Saneamentu no Ambiente, AMD, Domingos Godinho, rekoñese lixu nafatin domina iha Dili laran tanba komunidade sira seidauk iha konsiénsia atu soe tuir lixu iha nia fatin.

“Lixu ne’ebé mak sei nakonu iha sidade Dili ne’e tanba konsiénsia mai husi ita-nia komunidade, entaun durante ne’e Governu kontratu ona ho karreta kaminiota 50 ne’ebé mak ra’ut lixu iha Dili laran,” Domingos Godinho   informa ba jornalista sira iha nia kna’ar fatin AMD Matadouru, ohin.

Nia dehan, kada empreza lokál iha nia supervizór no atu tau matan ba ra’ut lixu no mós iha Munisípiu Dili iha supervizór atu tuir sira hodi haree empreza sira foti lixu sira ne’e ka lae.

“Empreza lokál sira mós iha supervizór. Ita mós iha supervizór hodi haree tuir empreza sira ra’ut fo’er iha Dili laran ka lae. Entaun, ami-nia oráriu foti lixu tuku 6:00 dader depois ami konta kada loron ida tenke tula ret tolu. Ha’u fó ezemplu, rute ida husi Elemloi karreta ida husi Elemloi mai to’o rotunda Bairru-Pité ida ne’e hotu mak ba fali Rádiu Falintil nia kotuk depois mai Palásiu PR nia kotuk, agora atu tula karrada ida presiza oras tolu, entaun ita mak tenke komprende katak oras sia nia laran mak foin tula ret tolu. Tanba ne’e mak ita hotu hatene katak atu ra’ut lixu ne’e la’ós makina mak tula atu oras ida moos ona maibé, ida ne’e ema mak tula entaun presiza oras naruk,” nia afirma.

Diretór Servisu Munisipál Água Saneamentu no Ambiente ne’e esplika, Ret tolu ne’e bazeia ba kontratu bainhira empreza ra’ut lixu mak sei iha ida ne’e   hein fali ba loron aban mak foti fali.

Notísia relevante: https://tatoli.tl/2024/02/20/abril-posibilidade-ekipamentu-pezadu-rsu-hahu-foti-lixu-iha-dili/

Iha fatin hanesan, Xefe Suku Motael, Luis Antonio Candido Gusmão Viegas, informa, durante ne’e kaminiota sira mai ra’ut lixu iha área Motael nian ho di’ak maibé lixu sira ne’e lixu komunidade nian.

“Ami mós durante ne’e servisu hamutuk ho ami-nia komunidade oinsá atu tau matan ba transporte sira ne’ebé mak mai ra’ut foer, maibé ami-nia problema mak oráriu rekolla lixu ne’e mak la fixu ida, tanba semana ida dala haat deit, nune’e lixu sira ne’e mai husi komunidade sira, la’ós mai husi lixu komérsiu nian,” Luis Antonio Candido Gusmão Viegas informa.

Autoridade lokál ne’e mós esplika, iha komunidade balun mak seidauk iha konsiénsia atu soe tuir lixu iha nia fatin tanba lixu sira ne’e maioria plástiku akua no selseluk tan.

Entretantu, antes ne’e akadémiku no sosiedade sívil husu Governu implementa dekretu-lei númeru 37/2020, kona-ba uzu plástiku iha Timor-Leste, ho rigór.

Notísia relevante: https://tatoli.tl/2024/02/21/akademiku-no-sosiedade-sivil-husu-governu-implementa-dekretu-lei-numeru-37-2020-ho-rigor/

 

Jornalista : Felicidade Ximenes

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!