COVALIMA, 27 fevereiru 2024 (TATOLI) – Ministériu Saúde (MS) liuhusi Departamentu Edukasaun no Promosaun Sáude (EPS) lori programa hakbesik ba komunidade hodi deklara Área La So’e Fo’er Boot Arbiru (ALFA) iha postu administrativu Fatumea, munisípiu Covalima.
“Ita deklara ona Área La So’e Fo’er Boot Arbiru (ALFA) tanba uma-kain ida-idak konstrui ona hariis-fatin própriu. Hahú ohin bá oin sira la so’e fo’er boot arbiru iha área livre”, Diretora Nasionál Edukasaun no Promosaun Saúde, Emília Mendonça, hato’o iha salaun postu Fatumea, ohin.
Nia dehan bainhira abitante so’e fo’er boot arbiru sei kria klima ne’ebé la saúdavel hodi kria moras respiratória, moras kulit, diareia no oan sira iha lumbriga, tanba ne’e presiza prevene ho deklara ona ALFA iha Fatumea.
Ho programa deklara ALFA komunidade hotu tenke abitua ona so’e fo’er boot iha nia fatin ne’ebé mak kada família sira prepara ona hafoin sintina tenke fase liman ho sabaun atu asegura nafatin família saudavel .
Aleinde ne’e, Edukasaun no Promosaun Saude mós implementa programa sira hanesan nutrisaun, saúde inan ho oan ne’ebé mak Ministériu Saúde hala’o hela advokasia oinsá família prepara ai-han ne’ebé nutritiva, oinsá joven forma família ne’e saida mak nia tenke prepara no kous bebé ho saudavel ne’ebé alarga ona iha territóriu tomak.
Reprezenta Administradór Munisípiu Covalima, Cesar Madeira Amaral, agradese ba Ministériu Saúde tanba implementa programa refere ne’ebé hakbesik ba komunidade, nune’e sira iha konsiénsia hodi livre husi ALFA.
“Ita konsege konstrui hariis-fatin ba kada uma-kain ne’ebé lahetan apoia husi Governu no doadór sira, maske balun hetan ameasa tanba hakarak komunidade moris iha ambiente ne’ebé saudavel”, dehan.
Populasaun iha Fatumea hamutuk 4.473 no totál xefe família 1.110 husi suku Belulik-leten ho nia populasaun 2,294,suku Fatumea nia populasaun 1.104 no Nanu 1.075.
Reprezenta Diretór Servisu Saúde Munisípiu Covalima Agapito de Jesus, reforsa katak implementasaun programa refere iha suku 30 (falta de’it suku tolu mak seidauk), aldeia 148, iha postu administrativu hitu dezde 2018 ne’ebé nia orsamentu finansia husi UNICEF.
“ Ita implementa programa ALFA iha 2018 no deklara iha 2024 tanba hasoru dezafiu, maibé tenke la’o ho neneik nune’e bele observa komunidade utiliza saneamentu báziku ne’e oinsá”, relembra.
Implementasaun programa ALFA hasoru dezafiu tanba komunidade sira seidauk iha koñesomentu di’ak oinsá atu uza saneamentu báziku no parseiru barak fó apoiu materiál atu konstrui sintina maibé abitante difsil atu uza sasán, tanba haree ba ekonomia família sei falta.
Tuir planu, iha loron 29 fevereiru, Ministériu Saúde kontinua deklara programa ALFA iha postu administrativu Fohorem.
Notísia relevante: Autoridade suku Nahareka deklara ALFA
Jornalista: Celestina Teles
Editora: Maria Auxiliadora
