DILI, 29 fevereiru 2024 (TATOLI)—Primeiru-Ministru (PM), Kay Rala Xanana Gusmão, kinta ne’e, hala’o enkontru ho Embaixadór Malázia ba Timor-Leste, Amarjit Sarjit Singh ho delegasaun setór privadu sira, hodi atualiza informasaun kona-ba posibilidade atu investe.
“Ha’u lori delegasaun setór privadu hosi Malázia hasoru malu ho Primeiru-Ministru Xanana, diskute kona-ba asuntu importante sira ne’ebé antes ne’e hala’o ona diskusaun, mai hodi atualiza filafali informasaun téknika sira kona-ba esforsu antes ne’e, ne’ebé Embaixada Malázia inklui setór privadu Malázia konkorda atu dezenvolve sistema saúde ne’ebé di’ak iha Timor-Leste, no ami diskute mós kona-ba atu dezenvolve setór petrolíferu no investe iha área saúde no seguransa alimentár. Ami ko’alia asuntu espesífiku rua ne’e,” Amarjit Sarjit Singh, hateten hafoin enkontru ho Xefe Governu, iha Palásiu Governu.
Notísia relevante : Malázia apoiu FSTL konstrui kampu Sepaktakraw
Biban ne’e, Diplomata ne’e atualiza mós katak tempu besik país rua sei selebra asinatura akordu aéreu.
“Iha oportunidade ida-ne’e, ha’u mós atualiza ba Primeiru-Ministru Xanana kona-ba asuntu akordu aéreu nian, ne’ebé sei asina entre Malázia no Timor-Leste, diskusaun finaliza ona, agora hein atu asina akordu hodi ita fasilita aviaun bele semo ona tuir oráriu hosi Kuala Lumpur mai Dili no Dili bá Kuala Lumpur iha tempu bedak,” nia tenik.
Xefe Governu agradese no promete sei atualiza informasaun sira ne’e hotu ba membru Governu tutela sira atu apoia servisu hotu ne’ebé país rua koopera hodi bele finaliza lalais akordu hirak ne’e iha tempu besik.
Antes ne’e, Governu Malázia mós deklara sei ajuda polítika desentralizasaun ne’ebé IX Governu Konstitusionál sei implementa.
Jornalista : Antónia Gusmão
Editora : Julia Chatarina
