iklan

COVALIMA, HEADLINE

Programa ALFA implementa ona iha Fohorem

Programa ALFA implementa ona iha Fohorem

RepreZenta Ministériu Saúde akompaña husi Administradór Fohorem tesi fita deklara livre husi ALFA. Imajen/Celestina Teles.

COVALIMA 29 fevereiru 2024 (TATOLI) – Ministériu Saúde (MS) no Organizasaun Naun-Governamentál Haburas Ita Moris (HIM) implementa ona Programa Área La So’e Fo’er Arbiru (ALFA) iha postu administrativu Fohorem, iha Covalima, tanba hakarak komunidade moris iha ambiénte saudavél hodi prevene moras diarea no  respiratória.

“Ohin loron ita deklara tan ona postu Fohorem livre husi ALFA, ne’ebé durante ne’e Ministériu  Saúde hamutuk ho parseiru [HIM] la’o tama-sai uma hodi motiva komunidade atubele muda sira-nian mentalidade moris ho saudavel”, reprezentante MS, Agustino de Oliveira hatete.

Nia fó hanoin ba xefe suku sira atu kontinua motiva populasaun sira ne’ebé daudaun ne’e konstrui sintina ho manuál, bainhira aat karik nafatin atu hadi’a nune’e garante ambiente ne’ebé moos hodi prevene aan husi moras.

“Ba xefe suku ho nia estrutura, bainhira komunidade nia sintina aat motiva nafatin tanba planu asaun komunidade ita mak harii rasik. Bainhira iha ona kbiit konstrui sintina ne’ebé di’ak”, sujere.

Reprezentante Diretór Servisu Munisipál Saúde Covalima, Agapito de Jesus, reforsa katak atu muda ema nian mentalidade la fásil molok deklara livre husi ALFA, tanba MS serbisu hamutuk ho parte HIM ne’ebé hetan apoiu fundu husi UNICEF  hala’o uluk sensibilizasaun kona-ba saneamentu báziku.

Nia esplika katak porsesu atu tama iha faze deklara livre husi ALFA ne’e MS tenke halo verifikasaun liuhusi implementasau Programa Saúde na Família hodi halo observasaun ba komunidade nia mentalidade atu uza sintina ne’ebé mak kada uma-kain konstrui ona.

“Bazeia ba verifikasaun, komunidade iha ona koñesimentu di’ak hodi uza sintina iha kada uma-kain, maibé sintina ne’ebé ita konstrui ona labele halo deit fo bainaka sira mak tenke uza”, nia fó hanoin.

Agapito de Jesus mós husu ba joven sira ne’ebé forma ona família fó prioridade ba konstrui sintina, nune’e bele garante ambiénte limpu atubele prevene moras sira hanesan diareia, respiratória no labarik sira labele iha lumbriga.

Administrador Postu Fohorem, Delfim Amaral, admite katak Fohorem deklara ona ALFA, maibé hasoru difikuldade tanba komunidade sira la asesu bee-moos, nune’e daudaun ne’e sira kuru de’it bee posu.

Ho problema falta bee-moos, hanesan lidér postu iha responsabilidade atu buka soluasaun nune’e oinsá mak komunidade bele hetan bee-moos.

Populasaun iha Fohorem hamutuk 6.123 ho totál xefe família 1.570, kompostu husi mane 3.121 no feto 3.002. Postu ne’e iha suku haat mak Dato-Rua, Dato-Tolu, Fohorem no Laktos nomós iha aldeia 15.

Tuir planu, iha marsu, Ministériu Saúde sei kontinua deklara ALFA iha postu administativu Fatululik no Tilomar. Antes ne’e mós realiza ona iha postu administrativu Fatumea.

Notísia relevante: Fatumea deklara livre husi ALFA

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!