DILI, 07 marsu 2024 (TATOLI)—Diretór Ezekutivu Ajénsia Nasionál Avaliasaun Akreditasaun Akadémika (ANAAA), Nilton Paiva, hateten ANAAA halo ona avaliasaun akreditasaun ba kursu 30, ne’ebé sei fó sai rezultadu avaliasaun programátika ba ensinu superiór sira.
Notísia Relevante: ANAAA sei halo avaliasaun ba kursu 10 iha DIT-ISC-ICS
“ANAAA sei hasai rezultadu provizóriu hosi avaliasaun akreditasaun ne’ebé mak hala’o iha fulan-jullu to’o outubru tinan 2023. ANAAA halo ona avaliasaun akreditasaun ba kursu 30 no instituisaun ida,” Nilton Paiva, hateten ba jornalista sira, hafoin partisipa iha desiminasaun rezultadu peskiza ba moras iperténsia, iha salaun INFORDEPE, Balide, kinta ne’e.
Diretór Ezekutivi Paiva hatutan, programa sira-ne’e maihosi Universidade da Paz (UNPAZ), Universidade Dili (UNDIL), Universidade Orientál Timor Lorosa’e (UNITAL), Institutu Superiór Cristal (ISC), Dili Institut of Technology (DIT), Institut of Bussines (IOB), Instituto Católico para a Formação de Professores (ICFP) no East Timor Coffee Institute (ETCI).
Hosi totál kursu 30 ne’e, ANAAA konvida mós avaliadór internasionál hosi Indonézia, sira mak mai hamutuk ho avaliadór nasionál sira no ANAAA mós halo avaliasaun no akreditasaun ba instituisaun ida mak Insititutu Boaventura Timor-Leste (IBTL) Manufahi-Same nian.
Diretór ANAAA husu ba universidade sira atu halo rekursu, karik rezultadu ne’ebé kompara ho realidade ne’ebé mak iha, se buat ruma ne’ebé presiza atu ko’alia mak loron 15 tuir lei, atu bele mai halo rekursu.
Durante tinan ida 2023 ne’e sira halo servisu durante tinan kotuk ne’e, sei lansa mós akreditasaun ba instituisaun neen (6), instituisaun ida mak akredita Universidade Católica (UCT) no instituisaun lima (5) mak reakredita no kursu 42, ne’ebé mak tinan ne’e ANAAA sei halo.
Antes ne’e, Ministru Ensinu Superiór Siénsia no Kultura (MESSK), José Honório Jerónimo, hateten bolu aviadór internasionál mai ne’e importante tebes, tanba atu aposta ba kualidade ba rezultadu sira-ne’ebé ANAAA halo.
Ida-ne’e tenke apoiu malu duni, karik Governu la’o ketak, ensinu superiór la’o ketak, ne’e ba futuru sei iha problema.
“Iha buat balun dehan ladi’ak, ita ko’alia ba malu, ita hakarak aposta ba kualidade no ensinu superiór ne’e la’o di’ak. Tanba ne’e, rezultadu avaliasaun ne’ebé ANAAA halo ne’e importante. Iha tinan oin rigór uitoan, nune’e ita-nia kursu sira-ne’e halo avaliasaun,” nia dehan.
ANAAA simu ona rekursu husi instituisaun ida
Diretór ezekutivu ANAAA dehan, rezultadu ne’e sei fó iha fulan-abríl tinan ne’e. Agora daudaun ne’e, DIT mak halo ona rekursu, sura seluk nee haruka karta mai apresia ba servisu ANAAA ne’ebé mak ajuda sira iha tempu barak dezde kedas preparasaun to’o iha akreditasaun.
“Ne’e mak ita hatene UNITAL, UNDIL, UNPAZ, IBTL, ETCI, IOB sira-ne’e apresia ba rezultadu ne’ebé mak hosi ANAAA fó sai ona ba sira. Resposta ne’e iha semana oin, no iha abríl mai ne’e rezultadu iha Jornál da Repúblika ona,” nia dehan.
Notísia Relevante: ANAAA fó sai ona rezultadu akreditasaun provizóriu 2023
Jornalista : Osória Marques
Editór : Cancio Xiemenes
