DILI, 11 marsu 2024 (TATOLI)–Xefe Departamentu Autorizasaun no Introdusaun Merkadu Produtu Farmasia no Medikamentu hosi Dirasaun Nasionál Farmasia no Medikamentu iha MS, Teodoro de Jesus, hateten empreza Costa Herbal 2 hanesan importadora aimoruk herbal Tianshi rejistu iha Ministériu Saúde (MS).
Notísia Relevante: Aimoruk Herbal Barak Seidauk Rejistu Iha Ministériu Saúde
“Aimoruk Herbal lolos ne’e só Tianshi. Importadora Costa Gibran 2 mak foin rejistu produtu naran Herbal Tianshi. Produtu ne’e tuir padraun Azia nian,” Xefe Departamentu ne’e hateten ba Agência Tatoli, iha Caicoli, segunda ne’e.
Nia esplika, empreza aprezenta dokumentu komprovativu hanesan sertifikadu analisis atu haree kona-ba padraun kualidade produtu.
“Se produu hosi Indonésia, padraun saida mak sira uza hanesan livru matadalan. Aimoruk ne’e iha nia prazu ho durasaun tinan tolu, tanba ne’e mak Governu foun agora ne’e aplika sistema foun husu estabilidade data ba aimoruk. Aimoruk tenke tuir klima 30 grau tuir zona IVb,” nia esplika.
Empreza lori dokumentu kompravativu katak aimoruk herbal Tianshi ne’e iha kualidade ho ema bele sosa no konsome.
Tuir nia, aimoruk ne’ebé mamar loos no faan iha merkadu, tuir MS hetan informasaun tenke foti hodi bele halo teste ba kualidade.
Aimoruk Herbal hanesan K-LINK no HWI ne’e produtu aimoruk ilegál, tanba seidauk rejistu iha MS.
Nia husu ba empreza sira hodi bele rejistu sira-nia aimoruk no husu ba populasaun atu husu aimoruk sira-ne’e rejistu no hetan lisensa ba importasaun mak bele sosa.
Kona-ba aimorul Herbal Tianshi
Aimoruk Herbal Tianshi nu’udar aimoruk herbal ne’ebé famozu no iha provas resolve problema saúde, inklui estomuk, kolestrol aas, diabetes, ipertensaun no selu-seluk tan. Aimoruk herbal Tianshi prodús hosi materiál natureza nian ne’ebé ho kualidade aas, nune’e aseguru no efetivu bainhira ema uza.
Istória kona-ba aimoruk herbal Tianshi
Aimoruk herbal Tianshi maihosi Tiongkok, nasaun ida-ne’ebé koñesidu ho medisina alternativa. Iha tinan 1995, Dr. Li Jinyuan estebeelse empreza Shouhan Tianshi Group, ne’ebé foku ba halo peskiza no dezenvolvimentu produtu naturál ba saúde. Sira-nia produtu ida di’ak-liu ne’ebé sira prodús hosi empreza ne’e mak aimoruk herbal Tianshi.
Kompozisaun aimoruk herbal Tianshi
Aimoruk herbal Tianshi halo hosi materiál natural ne’ebé ho kualidade aas mak hanesan Cordyceps Sinensis, Ganoderma Lucidum, Propolis nos elu-seluk tan. Materiál hirak ne’e prodús ho teknolójia moderna no padraun GMP (Good Manufacturing Practice), nune’e rezulta produtu ne’ebé iha kualidade aas no seguru.
Jornalista : Jesuína Xavier
Editór : Cancio Ximenes
