DILI, 03 Abríl 2024 (TATOLI) – Sekretáriu-Jerál Asosiasaun Nasaun Sudeste Aziátiku (ASEAN, sigla inglés), Kao Kim Hourn, husu ba Kámara Komérsiu no Indústria Timor-Leste (CCI-TL) atu investe iha setór turizmu, tanba área ne’e pertinente ba hasa’e kreximentu ekonómiku iha país.
Kao Kim Hourn hateten Timor-Leste iha oportunidade barak loos liuhusi CCI-TL hodi bele absorve empregu no hadi’a kreximentu ekonómiku iha Timor-Leste, nune’e bele prepara aan iha tinan sira tuirmai bainhira nasaun sai ona membru ASEAN.
“Hau vizita CCI-TL nia eskritóriu hodi fahe ha’u-nia esperiénsia no enkoraja sira atu investe iha setór turizmu no setór sira seluk ne’ebé iha motivasaun ba CCI-TL atu sai membru Kooperasaun Ekonómika Ázia-Pasífiku (APEC) no halo kooperasaun bilaterál ho Kámara Komérsiu no Indústria ASEAN (ACCI, sigla inglés) bainhira Timor-Leste sai membru ASEAN ho objetivu mak hasa’e kreximentu ekonómiku Timor-Leste nian”, sekretáriu-jerál dehan iha Acait, ohin.
Nia husu mós ba Governu Timor-Leste atu apoia setór privadu sira, nune’e bele hamutuk harii reziliénsia ekonómika iha país, tanba papél setór privadu timoroan ka iha fatin ne’ebé de’it importante tebes atu dezenvolve país ba futuru ida di’ak liu.
“Setór privadu nia knaar ne’e importante tebes iha Timor-Leste, tanba ne’e CCI-TL no Governu tenke serbisu hamutuk hodi investe iha setór turizmu no setór relevante sira seluk atu aumenta kreximentu ekonómiku Timor-Leste nian iha futuru”, nia hateten.
Sekretáriu-Jerál ASEAN nia vizita bá CCI-TL ne’e rona mós saida mak sira halo ona no nia kompromete ba CCI-TL no Governu katak sei halo esforsu hodi koordena no komunika ho ACCI ho Asia Pacific Economic Cooperation (APEC) atu introdús CCI-TL ba sira, nune’e sira bele halo parseria ho CCI-TL atu dezenvolve ekonomia Timor-Leste.
Prezidente CCI-TL, Jorge Serrano, agradese ba vizita kortezia no apresia ba Sekretariu-Jeral ASEAN tanba bele fahe ona nia esperiénsia ba membru CCI-TL sira.
“Esperiénsia ida-ne’e sei útil ba membru CCI-TL sira atu implementa iha futuru, liuliu oinsá atu serbisu hamutuk ho Governu hodi dezenvolve setór turizmu no setór sira seluk hodi hasa’e kreximentu ekonómiku Timor-Leste nian”, nia espera.
Sekretáriu-Jerál ASEAN halo vizita ofisiál mai Timor-Leste, entre loron 01 no 04 Abríl, hodi hatán ba konvite ofisiál husi Ministru Negósiu Estranjeiru no Kooperasaun Timor-Leste, Bendito dos Santos Freitas.
Vizita ida-ne’e iha importánsia boot, haree ba funsaun krusiál Sekretariadu ASEAN nian hodi apoia avaliasaun ba Estadu-Membru ASEAN nian kona-ba Timor-Leste nia prontidaun atu adere ba ASEAN.
Vizita Sekretáriu-Jerál Kao Kim Hourn ne’e atu reafirma kompromisu Estadu-Membrus ASEAN nian hodi apoia dalan Timor-Leste nian ba adezaun plena ASEAN.
Durante nia vizita ne’e hasoru malu ho Prezidente Repúblika, José Ramos Horta, Prezidente Parlamentu Nasionál, Maria Fernanda Lay, no Primeiru-Ministru, Kay Rala Xanana Gusmão, nomós iha sesaun ida ho membrus Governu kona-ba adezaun Timor-Leste nian ba ASEAN.
Notísia relevante: Timor-Leste lansa programa futuru foin-sa’e ba ASEAN
Jornalista: Tomé Amado
Editora: Maria Auxiliadora
