BOBONARO, 05 abríl 2024 (TATOLI) – Eskola Ensinu Baziku Filiál (EBF) Moleana, suku Ritabou, postu administrativu Maliana, munisípiu Bobonaro, durante ne’e enfrenta hela problema bee-moos no laiha moru protesaun atu proteje fasilidade eskola.
Koordenadór EBF Moleana, Terezinha Vicente, hateten bee-moos no laiha moru protesaun, difikulta estudante sira atu tuir ensinu no aprendizajen.
Tuir nia, iha tinan hirak liubá parte eskola foti inisiativa harii lutu, maibé daudaun ne’e kondisaun ladi’ak no la seguru ona.
“Tempu udan animál tama, mai soe fo’er iha-ne’e, lutu ami halo tiha moos sai aat hotu. Karik ami hatama proposta ruma bele aprova ba, nune’e animál labele tama estraga ami-nia sasán iha área eskola nian,” nia informa ba jornalista sira iha kna’ar-fatin, kuarta ne’e.
Aldende problema ne’e, kondisaun eskritóriu profesór mós kakuluk kuaze aat hotu ona, tanba konstrui tinan barak ona.
“Agora kalen sira ne’e mós ku’ak hotu, tempu udan bokon hotu, ami de’it mós tuur iha eskola laran ladi’ak, sé bele troka tiha kalen ba, tanba ne’e dezde tempu Indonézia to’o agora,” nia hateten.
Xefe aldeia Moleana, Aquito Leto, husu Ministeriu Edukasaun atu tau prioridade hodi rezolve tiha problema ne’e.
Nia observa durante ne’e estudante sira susar tebes atu asesu casa de banho, tanba laiha bee-moos.
“Tanki profile iha hela, bak mós iha hela, hein deit ita liga bee hosi nia matan mai hamonu iha tanki, hodi fornese ba casa de bainho,” Xefe aldeia ne’e fó hanoin.
Ba kestaun ne’e, Diretor Servisu Edukasaun Munisípiu Bobonaro, Miguel Freitas, seidauk hetan informasaun klaru kona-ba problema ne’e.
“Ba oin, ha’u sei bolu sira hodi buka-tuir took informasuan ida-ne’e, depois ami bele hamutuk hodi buka ninia solusaun,” Diretór ne’e promete.
Nia mós apala ba komunidade sira atu sulan animál nune’e lebele movimenta livre iha arreadór eskola nian.
“Ita-nia Prezidente Autoridade orienta ona katak labele husik animál iha árreador eskola, ne’e tenke kuidadu atu animál labele tama, tanba eskola espasu ne’ebé espesiál ba estudante sira, labele hamutuk ho animál,” nia hateten.
Enkuantu eskola EBF Moleana iha sala aula tolu ho totál estudante 200-resin no totál profesór hitu, komposta hosi permanente lima no kontratadu rua, eskola refere iha sala ida ba pre-eskolár.
Notísia relevante: Edukasaun Bobonaro presiza tán karteira eskolár 165 ba eskola foun
Jornalista: Sergio da Cruz
Editór: Evaristo Soares Martins
