BOBONARO, 04 abríl 2024 (TATOLI) – Polísia Nasionál Timor-Leste (PNTL) Munisípiu Bobonaro, asegura ona estudante balu hosi Eskola Privada Cristal no Ensinu Sekundáriu Jerál númeru I Dom Martinho da Costa Looes Maliana, hafoin akontese konfrontu ka baku-malu iha Rotunda Maliana.
Akontismentu ne’e akontese iha loron kuarta (03/04) lokraik ne’e no kinta (04/04) ne’e tuku 10:45 kontinua fali iha fatin hanesan hafoin estudante sira fila husi ezame períodu dahuluk tinan letivu 2024.
Enkuantu suspeitu sira autoridade seguransa asegura ona iha eskuadra polísia Maliana hodi halo prosesu no daudaun ne’e parte PNTL seidauk fó komentáriu ruma kona-bá motivu hosi akontesimentu ne’e, tanba sei iha hela prosesu identifikasaun.
Haree ba aktu ne’e, Diretór Servisu Edukasaun Munisípiu Bobonaro, Miguel Freitas, sente triste no lamenta ho atetude estudante sira, tanba utiliza uniforme eskola baku-malu iha fatin públiku.
“Ha’u foin mak rona informasaun hosi ita-boot sira, depois ha’u sei halo auditoria ho parte inspesaun, maibé ha’u haree aktu ne’e ladi’ak, ne’e ami sei hamutuk ho parte inspesaun tuur hamutuk atu nune’e bele fó hanoin ba malu, atubele hetan nia solusaun no labele akontese tán,” nia informa ba jornalista sira iha Eskola Ensinu Báziku Sentrál (EBC, sigla portugés) Raifun, kinta ne’e.
Nia husu ba parte eskola no inan-aman atu idak-idak kontrola oan sira bainhira ba no fila eskola no apela ba estudante sira atu hapara ona asaun ne’e tanba utiliza farda eskola baku-malu hatudu imajen ladi’ak ba públiku.
Diretór Ensinu Sekundaria Jerál Númeru I Dom Martinho da Costa Lopes Maliana, Abel Sarimau, seidauk iha informasaun kona-bá problema ne’e tanba akontesimentu ne’e fora hosi arreadór eskola.
“Derrepente de’it iha mídia sosiál ami hosi eksola hakfodak, eskola la hatene akontesimentu ne’e, maibé iha tempu badak ami sei bolu Prezidente APP, Ofisiál Polísia Eskola (OPE) halo enkontru nune’e bele buka-tuir labarik sira-ne’e,” nia alerta.
Diretór Abél Sarimau konsidera aktu estudante sira kontra regulamentu interna eskola no sirkulár hosi Ministériu Edukasaun nian, ne’ebé bandu estudante sira halo problema utiliza uniforme eskola.
“Iha ambiente eskola estudante sira hakmatek, pontuál, disiplina, agora sai ba li’ur tanba provokasaun, talvez halo sira emosaun ne’e ita la espera, neʼebé ami sei haree, buka-tuir took labarik ne’e se, depois bolu inan-aman hodi eduka hamutuk,” nia tenik.
Enkuantu tuir observasaun Jornalista Tatoli iha terrenu kinta (04/04) ne’e, konfrontu referidu inklui mós joven balu ne’ebé la utiliza uniforme eskola no problema ne’e halo komunidade no negosiante sira pániku, tanba duni-malu no tuda malu hosi Rotunda Maliana ba to’o merkadu laran.
Notísia relevante: PNTL la tolera ema li’ur asalta estudante DMCL Maliana
Jornalista: Sérgio da Cruz
Editór: Evaristo Soares Martins
