PNDS Oé-Cusse orienta fornesedór estabelese armazein atu aselera projetu
OÉ-CUSSE, 09 abríl 2024 (TATOLI) – Ekipa Programa Nasionál Dezenvolvimentu Suku (PNDS), Rejiaun Administrativa Espesiál Oé-Cusse Ambeno (RAEOA), tersa ne’e hala’o enkontru ho fornesedór hamutuk 19 mai hosi suku 18 iha territóriu Oé-Cusse, atu estabelese armazein materiál iha nível suku idak-daik nune’e bele aselera projetu sira.
Notísia relevante: PNDS Oé-Cusse sei ezekuta rihun $930-resin atu finansia programa 16
Diretór PNDS Oé-Cusse, João Bobo, informa, objetivu estabelese armazein, atu aselera progresu servisu PNDS nian, nune’e bele kontribui ba ezekusaun orsamentu PNDS nian.
“Orientasaun MAE no Sekretáriu Ezekutivu PNDS nian, katak ezekusaun orsamentu tarde, no orsamentu iha konta bankária sei barak tanba nia ezekusaun fíziku ki’ik, entaun bazea ida-ne’e ami tenke buka maneira hodi ezekuta orsamentu 2023-2024 no 2021-2022, ami tenke aselera, atu kontribui ba maneira ezekusaun ne’e, ami konvida fornesedór sira nu’udar parseiru dezenvolvimentu suku atubele aselera servisu PNDS nian bele lais,” João Bobo, hateten, iha Oé-Cusse, tersa ne’e.
Notísia relevante: PNDS Oé-Cusse realiza formasaun iha área tolu mellora servisu iha baze
Nia esplika, iha 2023, Governu Sentrál aloka osan ba PNDS RAEOA hamutuk $782,361.39 atu finansia projetu hamutuk 19 maioria loke estrada no aumenta sala aula ba eskola sira, ho nia ezekusaun fíziku ba projetu sira-ne’e foin atinje 6,12%.
“Agora nia gastu daudaun ne’e ita foin halo levantamentu $33,810.25 ho nia gastu foin atinje 4,30%, ho nia balansu iha hela banku $748,551.14, ba 2024 projetu sira la’o daudaun iha suku maibé kona-bá orsamentu seidauk iha transferénsia hosi nasionál,” nia afirma.
Tanba ne’e, PNDS orienta fornesedór sira, nu’udar manán-na’in iha suku, konstribui ba prosesu ezekusaun osaramentu PNDS nian, oinsá sira bele estabelese armazein iha kada suku, nune’e sira bele mobiliza materiál tau iha armazein, depois tau iha suku atu fasilita ekipa hala’o servisu.
Nune’e, bainhira estabelese ona armazein iha suku, ba servisu tomak entrega ba ekipa PNDS no traballdór nian, importante maka fornesedór nia obrigasaun tenke hatún materiál iha suku atu apoia gastu orsamentu nian bele la’o.
“Tanba orsamentu 2023 transfere iha novembru 2023, agora iha ameasadu atu dada fali ba kofre Estadu iha fim do ano, kuandu implementasaun la hotu, ida-ne’e ita lakohi no husik de’it, maibé tenke ezekuta ba komunidade sira, tanba prioridade iha ona, maibé orsamentu dada fali, entaun ami tenke buka maneira oinsá orsamentu labele dada fali ba kofre Estadu,” nia katak.
Notísia relevante: Xefe suku sira husu Parlamentu Nasionál fiskaliza ezekusaun PNDS iha Oé-Cusse
Iha biban ne’e Juventus Elo, nu’udar fornesedór, agradese, tanba liuhosi enkontru ne’e, bele hametin liután liña koordenasaun, atu kontribui ideia aselera projetu PNDS iha Oé-Cusse.
“Ita iha obrigasaun simu orientasaun hosi PNDS, tanba kompañia ne’ebé sai vensedór atu fornese materiál tenke iha armazein, tan ne’e nu’udar timor-oan ha’u tenki servisu hamutuk ekipa PNDS tantu hosi munisípiu no postu to’o suku no servisu hamutuk ho autoridae lokál sira, nune’e konfiansa ne’ebé ami hetan hosi PNDS, tenke la’o hp di’ak,” nia katak.
Jornalista: Abílio Elo Nini
Editór: Evaristo Soares Martins
