CCI-TL partilla informasaun ba estudante universitáriu kona-ba adezaun Timor-Leste ba OMK
DILI, 15 Abríl 2024 (TATOLI) – Kámara Komérsiu no Indústria Timor-Leste (CCI- TL, sigla portugés) partilla informasaun kona-ba adezaun Timor-Leste nian ba Organizasaun Mundiál Komérsiu (OMK) ba estudante husi Universidade Nasionál Timor Lorosa’e (UNTL), liuhusi semináriu nasionál ho tema “Sutentabilidade Ekonómika, Preparasaun Rekursu Umanu, Dezafiu no Oportunidade Timor-Leste nian sai membru OMK”.
Prezidente CCI-TL, Jorge Serrano, hateten atividade ne’e realiza iha ámbitu aniversáriu CCI-TL nian ba da-14 hodi partilla informasaun sobre OMK, tanba Timor-Leste tama ofisialmente sai membru OMK hamutuk ho nasaun 164.
“CCI-TL tenke serbisu hamutuk ho Governu Timor-Leste, setór privadu, inklui akadémiku sira husi UNTL no universidade sira seluk atu prepara rekursu umanu sira hodi hametin ekonomia Timor-Leste nian. Ita tenke serbisu ho entidade hotu-hotu no halo preparasaun boot hodi hasa’e produsaun lokál ho kualidade aas hodi kumpre sertifikasaun OMK nian”, Jorge Serrano dehan iha salaun Komisaun Nasionál ba Eleisaun, Colmera, ohin.
Iha fatin hanesan, Prezidente Kámara Munisípiu Dili, Helder Aniceto, hateten semináriu ne’e mós nasionál ne’e hala’o ho objetivu atu fahe informasaun kona-ba atividade OMK nian ba estudante sira husi UNTL inklui membru CCI – TL atu hetan koñesimentu kona-ba OMK no bele implementa tan hodi hametin investimentu ekonómiku iha Timor – Leste.
“Haree ba estudante UNTL, membru CCI-TL inklui setór privadu atu aproveita oportunidade ida-ne’e hodi aprende esperiénsia foun sira no tuirmai implementa iha futuru hodi sai parte importante husi OMK hodi diversifika ekonomia Timor-Leste nian,” nia konklui.
Estudante husi Fakuldade Ekonomia-UNTL, Carlos Sequeira Ribeiro, haktuir katak semináriu sira hanesan parte ida atu hasa’e koñesimentu estudante sira-nian, inklui membru CCI-TL kona-ba diverifikasaun ekonómika no bele sai parseiru di’ak ida iha futuru bainhira Timor-Leste sai membru OMK.
“Ha’u hakarak rona saida maka ita-nia CCI-TL prepara ona oinsá atu hametin investimentu iha Timor-Leste bainhira ita sai ona membru OMK. Hau orgullu tanba ita-nia organizasaun [ne’ebé serbisu iha setór ekonómiku] sira halo hela esforau boot atu reforsa ekonomia iha nasaun ne’e”, dehan.
Oradór ba semináriu nasionál ne’e mai husi Ministériu Komérsiu no Indústria (MCI), Ministériu Koordenador ba Asuntu Ekonómiku (MCAE), Banku Sentral Timor-Leste (BCTL) no UNTL.
Rekorde katak Timor-Leste, liuhusi Vise-Primeiru-Ministru no Ministru Koordenadór Asuntu Ekonómiku, Francisco Kalbuady Lay, ho Diretora-Jerál Organizasaun Mundiál Komérsiu, Ngozi Okonjo-Iweala, asina formalmente deklarasaun sai membru OMK, iha loron 26 Fevereiru ne’e iha Abu Dhabi.
Notísia relevante: Sekretáriu-Jerál ASEAN enkoraja CCI-TL investe iha turizmu hodi hasa’e kreximentu ekonómiku país
Jornalista: Tomé Amado
Editora: Maria Auxiliadora
