DILI, 20 abríl 2024 (TATOLI)—Prezidente Repúblika (PR), José Ramos-Horta, husu Partidu Kmanek Haburas Unidadade Nasionál Timor Oan (KHUNTO) atu kontinua sai partidu ne’ebé bele kontribui ba estabilidade polítika nasionál.
“Hanesan partidu KHUNTO, tenke buka kontribui ba pás no estabilidade para ita-nia povu labele kiak barak demais no labele riku boot, riku no kiak fahe malu la’ós tanba de’it polítiku maibé riku no kiak ne’e fahe malu iha klase sosiál. Hanesan partidu tenke hakbesik grupu rua kiak tantu riku. Ida-ne’e mak ha’u-nia filozofia ne’ebé ha’u iha. Kontinua apoiu Governu ne’ebé ha’u mak hili, ha’u mak deside tuir Konstitusaun, Parabéns ba Apa Naimori no Ama Berta, ha’u simu konvite hanesan padriñu ka patronu KHUNTO nian, ha’u simu tanba ha’u serbisu ba partidu sira hotu,” José Ramos-Horta hateten durante partisipa iha Kongresu Nasionál Partidu KHUNTO, ne’ebé hala’o iha salaun Delta Nova, sábadu ne’e.
Iha fatin hanesan, Prezidente partidu KHUNTO, Armanda Berta dos Santos, hateten, maski partidu ne’e hasoru dezafiu oin-oin, maibé nunka hamate no hamihis vontade hanesan partidu hodi luta nafatin ba vitória partidu nomós vitória ba povu no nasaun.
Berta apresia ho KHUNTO nian ezisténsia desde iha tinan 2012-2024 to’o agora tanba povu kontinua fó konfiansia hanesan iha eleisaun 2012 hahú partisipa eleisaun ho votu 13.998, eleisaun parlamentár 2017 atinje votu 36.547 no iha eleisaun parlamentár 2023 sa’e ba 52.103.
“Liuhusi kongresu ida-ne’e, ha’u hakarak kongratula povu tanba fó konfiansa ba KHUNTO. Ha’u husu ba ita hotu ne’ebé hola parte iha kongresu ida-ne’e atu durante loron rua kongresu tenke hatudu imi-nia maturidade hodi deskute vida partidu no deskute vida nasaun ho di’ak, nune’e kongresu loron-rua ne’e bele la’o diak to’o finál,” nia kongratula.
Notísia relevante : KHUNTO sei realiza kongresu nasionál da-haat iha aban
Nune’e mós, Konselleiru Partidu KHUNTO, José dos Santos Naimori ‘Bukar’, reforsa, desde uluk partidu ne’e iha kompromisu atu kontinua kontribui ba estabilidade polítika no apoia ba kualker Governu ne’ebé kaer ukun atu Governu bele halo dezenvolvimentu ba povu no rai ida-ne’e.
“KHUNTO kontinua tau importánsia ba unidade nasionál hodi apoia ba Governu sé de’it hodi lori povu ba moris di’ak. Ita-boot sira hatene katak kuandu KHUNTO la hanoin unidade nasionál karik, maka sei la aprova Orsamentu Jerál Estadu, maibé tanba hanoin unidade nasionál tanba orsamentu ne’e povu nian, hanesan partidu ida hakarak defende povu nia moris di’ak. Tanba ne’e, tenke aprova orsamentu hodi fó apoiu ba Governu atu nune’e orsamentu ida-ne’e bele halo dezenvolvimentu ba povu Timor-Leste,” nia adianta.
Prezidente Komisaun Nasionál Eleisaun (CNE, sigla portugés), José Agostinho Belo, konsidera, kongresu ne’e hanesan momentu importante atu deskute vida partidu no nasaun.
“Ita hotu hatene katak Komisaun Nasionál Eleisaun hanesan órgaun independente ne’ebé Konstitusaun fó dalan atu serbisu hamutuk ho partidu hotu tanba ita ko’alia kona-ba demokrasia hanesan papél ida importante, tanba ne’e sein partidu, sein demókrasia,” nia afirma.
José Agostinho dehan, CNE mantein nafatin komunikasaun ho partidu hotu inklui KHUNTO atu nune’e partidu bele organiza-an ho di’ak atu aban bain-rua nia ema sira sai líder futuru no líder ba timoroan tomak.
“CNE sempre kompromete serbisu ho imi, ha’u kuandu hetan konvite, ha’u sempre mai, tanba ne’e maka mai partisipa mós kongresu ida-ne’e. Dala-ida tan susesu ba ita-boot sira hotu, tenke hadi’a nafatin partidu, tanba partidu ne’ebé modernu, ita-boot sira tenke deskute iha kongresu,” nia tenik.
Jornalista : Natalino Costa
Editora : Julia Chatarina
