iklan

POLÍTIKA

PN aprova projetu-lei Rejime Jurídiku Ezersísiu Direitu Petisaun iha finál globál

PN aprova projetu-lei Rejime Jurídiku Ezersísiu Direitu Petisaun iha finál globál

Parlamentu Nasionál (PN) liuhusi reuniaun plenária aprova projetu-lei númeru 3/VI(1a)-Rejime Jurídiku Ezersísiu Direitu Petisaun iha finál globál ho votu a-favór 53, kontra no abstensaun 0 (zero), tersa (23 abríl 2024). Imajen/TATOLI

DILI, 23 abríl 2024 (TATOLI)—Parlamentu Nasionál (PN), tersa ne’e, liuhusi reuniaun plenária aprova projetu-lei númeru 3/VI(1a)-Rejime Jurídiku Ezersísiu Direitu Petisaun iha finál globál ho votu a-favór 53, kontra no abstensaun 0 (zero).

Notísia Relevante: Komisaun A finaliza diskusaun projetu-lei Rejime Jurídiku Ezersísiu Direitu Petisaun

“Nune’e, votasaun finál globál pasa,” Prezidente Parlamentu Nasionál (PPN), Maria Feranda Lay, hato’o iha sala plenária, Parlamentu Nasionál.

Ho aprovasaun ne’e. parte komisaun A trata asuntu Justisa no Konstituisionál sei halo ninia redasaun finál ba projetu-lei ne’e hodi submete ba meza PN, hafoin PPN envia ba Prezidente Repúblika mak iha kompeténsia atu promulga.

Iha preambulu projetu-lei ne’e katak, funsionamentu no dezempeñu ba kualkér PN aprofunda no konsolida ho ezersísiu forte asaun sidadania ka ho reforsu partisipasaun sidadaun nia moris iha aspeitu oioin iha nasaun ho mediasaun ou intervensaun Parlamentu, nune’e petisaun nu’udar instrumentu previlejiadu ba exersísiu sidadania.

Maske nune’e, ordenamentu jurídiku Timor-Leste la dispoen, ho ida-ne’e lei ne’ebé estabelese Rejime Jurídiku ba Ezersísiu Direitu Petisaun, atu mellora kompreensaun, abordajen no ezersísiu direitu petisaun.

Deputadu proponente ba inisiativa ne’e intende Parlamentu presiza aprova lei espesífika hodi define konseitu, prosedimentu, prinsípiu no regra espesífika hodi sapoia figura jurídika ne’ebé konsagra iha Konstituisaun artigu 48 no RPN artigu 155 no 160, nu’udar instrumentu mediasaun entre Estadu no sosiedade sívil ho rápidu no efikas ho mekanizmu instituisionál no partikularmente bainhira iha dimensaun partisipasaun polítika ou interrese jerál.

Efetivamente, konferidu husi sidadaun direitu individuál ka koletiva, ezije órgaun soberania ou autoridade púlika sira hotu (esesaun ho Tribunál) defeza sira-nia direitu ou interrese, proteje husi konstituisaun ou lei sira husi forma petisaun, keixa ka reklamasaun.

Projetu-lei ne’e husi Kapítulu I Ámbitu no Dispozisaun Jerál ho nia artigu ualu (8), Kapítulu II Rekezitu formál no prosedimentu ho artigu ualu (8).

Kapítulu III Petisaun dirije ba Parlamentu Nasionál ho artigu 12, Kapítulu IV Dispozisaun finál ho artigu rua (2).

Tuir textu projetu-lei iha artigu 1 Ámbitu, katak prezente lei regula no garante ezersísiu direitu petisaun ba defeza direitu sidadaun iha konstituisaun, ba lei no interrese jerál, mediante aprezentasaun ba órgaun soberania ou kualkér autoridade públika ho ezesaun Tribunal ba petisaun, reklamasaun ou keixa.

Iha artigu 2 definisaun ba efeitu lei ne’e entende hanesan petisaun hanesan jerál aprezentasaun pedidu ou proposta ida ba órgaun soberania ida ka kualkér autoridade públika, ho sentidu atu toma, adota ka propoin determina medida.

Reklamasaun mak impugnação ba aktu ida perante órgaun, funsionáriu ka ajente ne’ebé prátika ka perante ninia superiór ierárkia, no keixa mak denúnsia kualkér inkonstituisionalidade ka ilegalidade hanesan funsionamentu anómalo kualkér serbisu ho vista adosaun medida kontra responsável.

Iha artigu10 to’o 17 prezente lei ne’e mós previstu kona-ba rekezitu formál no prosedimentu sira atu aprezenta petisaun, reklamasaun no keixa.

Enkuantu, artigu 19 to’o 30 ko’alia espesífika ba petisaun dirije mai Parlamentu Nasionál rasik.

Enkuantu, projetu-lei ne’e aprezenta husi Deputadu proponente Joaquim dos Santos, António Moniz Calau, Abilio Quintão Pinto (FRETILIN), Patrocinio dos Reis Fernandes, Albino da Silva, Romeio Moises (CNRT), Alexandrino Afonso Nunes (PD).

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!