DILI, 25 abril 2024 (TATOLI)–Sekretáriu Estadu Komunikasaun Sosial, Expedito Dias Ximenes, hateten komemorasaun revolusaun ai-funan ba da-50 (25 abríl 1974-25 abril 2024) iha Portugál ne´e hanesan loron liberdade no demokrasia ba povu Portugál, no hanesan inísiu loke dalan Timor-Leste nia liberdade.
Notísia Relevante: Revolusaun Ai-funan no influénsia polítika-diplomasia ho Timor-Portugés tuir Horta, Alkatiri–Roque Rodrigues
“Ita hotu hatene Revolução dos Cravus ne’e momentu ida istóriku no momentu ida-ne’ebé ita bele dehan inísiu liberdade, demokrasia no inísiu ba igualdade,” Sekretáriu Estadu Komunikasaun Sosial, Expedito Dias Ximenes, iha semináriu nasionál ho tema “Respondente liu 70% mak sente la seguru iha espasu públiku,” iha Delta Nova, Comoro.
Governante ne’e hateten, Revolusaun Ai-funan iha Portugal iha 25 abril 1974 ne´e akontese, provinsia sira iha koloniál portugés sira mós hetan Liberdade, nune´e Timor-Leste mós hetan nia independénsia unilaterál no hahu hosi ne’ebá kontinua luta durante tinan 24 atu konkista nia restaurasaun independensia.
Nia konsidera, loron 25 abril importante tebes ba Timor-Leste no “Sai istoria boot tebes” ba Timor-Leste hodi deside ba ukun rasik aan.
Prezidente Konsellu Rede Feto Timor-Leste, Zelia Fernandes, mós kongratula povu portugés no timorense ba komemorasau loron 25 abríl kona-ba Revolusaun Ai-funan ne´e.
“Loron 25 abril 1974 lorin liberdade no demokrasia ba Portugál, maibé mos lori liberdade mai Timor-Leste husi kolinializasaun portuges,” Prezidente Konsellu Rede Feto Timor-Leste, Zelia Fernandes, hateten.
Zelia Fernandes komenta, loron ida 25 Abril mós sai loron fundamentál ba luta libertasaun nasionál ba povu Timor-Leste ba prosesu ukun rasik aan.
Jornalista : Jesuína Xavier
Editór : Cancio Ximenes
