iklan

HEADLINE, KAPITÁL

Afetadu despeju iha Bidau: “ami kontinua iha ne’e to’o Governu fó solusaun”

Afetadu despeju iha Bidau: “ami kontinua iha ne’e to’o Governu fó solusaun”

Abitante afetadu despeju administrativu, Amélia dos Santos, hamutuk ho ninia membru família kontinua hela iha lona okos iha tasi-ibun Bidau Santa-Ana, kuarta (08/05/2024). Imajen Tatoli/Arminda Fonseca

DILI, 08 maiu 2024 (TATOLI)—Uma-kain 15 (husi uma-kain 40) iha Bidau Santa-Ana ne’ebé hetan despeju administrativu husi ekipa konjunta lidera husi Sekretária Estadu Asuntu Toponímia no Organizasaun Urbana (SEATOU) iha loron 18 abríl, daudaun ne’e kontinua hela iha lona okos iha tasi-ibun.

Abitante afetadu despeju administrativu, Amélia dos Santos, haktuir, desde ekipa SEATOU halo despeju ba sira-nia hela fatin, to’o agora sira kontinua nafatin hela iha tasi-ibun tanba iha Dili laiha fatin atu hela.

“Ami hela iha ne’e hamutuk uma-kain 15, iha uma-kain lima iha tasi-ibun no 10 iha rai-lolon, ami kontinua hela iha fatin ne’e to’o Governu mai fó solusaun ba ami, tanba ami hela iha fatin ne’e desde tinan 1980. Ha’u hili fatuk mak fa’an hodi fó eskola ba ha’u-nia oan sira, agora na’in-rua iha universidade hotu maibé ami-nia fatin ekipa mai sobu ona, ami hela fatin laiha ona,” Amélia dos Santos, informa ba Agência Tatoli iha tasi-ibun Bidau Santa-Ana, kuarta ne’e.

Notísia relevante : Ekipa SEATOU sobu uma no barraka 40 iha Bidau Santa-Ana

Tuir abitante ne’e, to’o agora laiha ekipa husi Governu mak fó apoiu ruma ba sira, maibé sira hetan apoiu ai-han husi igreja no partidu balun.

“Ekipa mai sobu tiha ami-nia uma, liu tiha orientasaun husi xefe suku haruka ami hatama ficha família no eleitorál, maibé ami lahatene atu halo saida tanba delegadu no delegada sira mai husu maibé la fó esplikasaun ruma. Ami kontinua hela iha ne’e to’o hetan esplikasaun klaru ruma husi Governu atu apoiu materiál ka koloka ami bá fatin ruma, ami sei hein tanba ami mai husi munisípiu, rai iha ne’ebá iha maibé ami fila mamuk lori saida mak halo uma,” nia hateten.

SEATOU halo diskrimisaun

Iha fatin hanesan, Abitante afetadu despeju administrativu, Julião dos Santos, sente triste no konsidera ekipa SEATOU halo deskriminasaun ba abitante sira iha Bidau Santa-Ana no Senggol tanba la halo uluk diálogu molok muda sai husi sira-nia fatin, enkuantu iha fatin seluk halo diálogu.

“Ami agradese ba ekipa SEATOU tanba sira-nia planu hakarak organiza Dili sai organizadu no dezenvolve Dili sai di’ak liután, ne’e di’ak, maibé nusa la halo diáolgu ho ami hanesan ho komunidade iha Tasi-tolu no seluk tan atu ami rasik mak sobu ami-nia sasán hodi uza fali maibé lae, iha Bidau Santa-Ana fó notifikasaun hotu ekipa mai kedas ho mákina sobu uma halo ami salva sasán hotu la biban,” nia triste.

Julião dos Santos konta tuir, ekipa husi munisípiu Dili fó notifikasaun ba uma-kain sira la hanesan, iha besik rate Bidau Santa-Ana hetan notifikasaun desde tinan kotuk maibé iha dalan kurva fatuk Bandeira hetan notifikasaun iha fulan-marsu nia-laran.

“Ami koopera maibé SEATOU nia asaun ne’e halo ami-nia laran moras tanba sente la konsidera ami nu’udar ema, tanba parte balun halo diálogu maibé balun lae, nune’e ami nafatin kontinua hela iha fatin ne’e to’o Governu foti desizaun ruma mai ami. Ami-nia ficha família no eleitorál ne’ebé parte suku rekolla ona ne’e ami sei hein hotu ida-ne’e, Governu atu apoiu ami materiál ruma ka osan ami sei hein tanba ami laiha fatin iha Dili,” nia reforsa.

Abitante afetadu despeju administrativu, Inocéncio Soares, sente triste  ho situasaun ne’ebé sira enfrenta.

“Agora ami akompaña notísia sira ne’ebé iha, fatin sira seluk ekipa rekuperasaun ne’e tun uluk bá terrenu hodi halo levantamentu dadus ba komunidade nia hela fatin no halo diálogu hotu mak fó notifikasaun durante loron ne’ebé determina, iha notifikasaun laran ne’e mak komunidade tenke hamamuk fatin, maibé ami-nia parte lae, fó de’it notifikasaun hotu ekipa mai kedas ho mákina pezadu sobu to’o ita labele salva ita-nia sasán,” nia tenik.

Ho nune’e, uma-kain hirak ne’e deside hela nafatin iha lona okos Bidau Santa-Ana to’o Governu iha desizaun ruma.

“To’o agora laiha ekipa rekuperasaun ruma mak mai foti ami-nia dadus, iha duni parte husi suku nian mak mai foti ami-nia ficha família no eleitorál maibé laiha líder komunitáriu ruma mak mai halo esplikasaun objetivu foti ami-nia dokumentu, ne’ebé ami kontinua hela iha fatin ne’e to’o hetan solusaun ruma husi Governu, tanba ami-nia oan sira eskola hotu iha Dili,” nia lamenta.

Iha biban ne’e, Jornalista Agência Tatoli tenta entrevista xefe suku iha sede suku Bidau Santa-Ana maibé okupadu ho serbisu no laiha fatin.

Abitante barak la asesu informasaun

Durante ekipa konjunta lidera husi Sekretáriu Estadu Asuntu Toponímia no Organizasaun Urbana, Germano Santa Brites Dias, halo diálogu ho komunidade iha Tasi-tolu, Jornalista Agência Tatoli, husu kona-ba preokupasaun públiku kona-ba la halo diálogu iha fatin seluk molok halo despeju administrativu.

Orbainhira ami ko’alia verbál, komunidade hatene saida mak atu halo ba sira maibé tanba husi munsípiu Dili seidauk halo notifikasaun maka ita prepara atu halo diálogu tanba la’ós sira mak ita atu halo diálogu, maibé tanba populasaun iha Masin-lidun, Tasi 2, Tasi 3 no sira seluk seidauk rona informasaun ne’e, entaun biban ne’e ita halibur hamutuk populasaun iha ne’e para ko’alia dala-ida de’it no ita halo serbisu,” Sekretáriu Estadu esplika.

Notísia relevante : Diálogu ho komunidade Tasi-tolu, SEATOU fó biban hamamuk fatin iha maiu nia-laran

Nune’e mós, Prezidente Autoridade Munisípiu Dili, Gregório Saldanha, reforsa, ekipa konjunta ne’ebé Governu estabelese halo serbisu halo identifikasaun no levantamentu dadus, hahú husi ponte Comoro tomak, liu-liu mota-ibun sira, Tasi-tolu no área afetadu seluk.

“Levantamentu dadus ne’e mak informa ba munisípiu Dili hodi iha halo notifikasaun eskrita tanba iha lamentasaun barak dehan ekipa halo notifikasaun verbál, nune’e komunidade bele halo preparasaun tuir lei,” nia dehan.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!