iklan

HEADLINE, SAÚDE

Servisu Hapara Fuma iha Dili la funsiona dezde Marsu

Servisu Hapara Fuma iha Dili la funsiona dezde Marsu

Servisu Hapara Fuma iha Formoza la funsiona dezde Janeiru.

DILI, 10 Maiu 2024 (TATOLI) – Servisu Hapara Fuma (SHF), ne’ebé lansa iha outubru 2021 iha Sentru Formoza, Dili, la halo ona atendimentu dezde Marsu tanba funsionáriu sira ne’ebé serbisu nia kontratu hotu no laiha medikamentu ba terapia substituisaun nikotínika ka nicotine replacement therapy (NRT).

Eis-responsavel SHF, Eldino de Castro Rangel, hateten sentru ne’e la funsiona tanba programa ne’e parseria ho Organizasaun Mundiál ba Saúde (OMS) no Ministériu Saúde (MS), maibé laiha kontinuidade.

“Kontratu termina iha dezembru 2023. Ministeriu Saúde rasik dehan orsamentu laiha, ne’ebé pesoál ne’ebé serbisu iha Sentru Hapara Fuma la hala’o ona knaar. Iha Fevereiru, nafatin bá serbisu, tanba atu estende kontratu, maibe tuir informasaun ne’ebé hetan katak OMS labele ona estende”, Eldino Rangel informa ba Tatoli via WhatsApp.

Dezde nia estabelesimentu, SHF fó ona tratamentu ba fumadór sira hamutuk rihun-resin no konsege lori ema liu 900 mak husik fuma, liuhusi NRT no akonsellamentu. Ema ne’ebé halo tratamentu iha SHF ho idade produtiva entre 17 no 40.

Objetivu OMS no MS kria sentru ida ne’e atu presta atendimentu ba ema-sira ne’ebé hakarak husik fuma, tanba fuma la’ós kontribui de’it ba ema nia saúde, maibé ligadu ba ekonomia família nian. Aleinde ne’e, atu prevene moras la hada’et, liuliu hadook ema husi fuma.

Ho kestaun sira ne’e maka MS kria mós sentru ne’e iha Liquiçá, Ermera, Ainaro no Rejiaun Administrativa Espesiál Oe-Cusse Ambeno (RAEOA).

Tuir Global Youth Tobacco Survey 2019, porsentu 30,9% husi labarik iha Timor-Leste ho idade entre 13 no 15 mak konsome tabaku, ne’ebé maioria estudante. Dadus husi OMS hatudu katak timoroan adultu 60,7% mak fuma, iha ne’ebé 9,4% mak feto.

Tuir Aliansa Nasionál Kontrolu Tabaku iha Timor-Leste (ANCT), timoroan ka uma-kain ne’ebé konsome no sosa tabaku ne’e gasta rendimentu kada fulan 30%.

Taxa ba moras internamentu iha ospitál hamutuk rihun 30 iha tinan-tinan no mate 20% ho idade produtiva tuir dadus OMS iha 2019.

Notísia relevante: OMS-MS hatama lista sosa NRT asegura fumadór hapara fuma tabaku

Jornalista: Jesuína Xavier

Editora: Maria Auxiliadora

iklan
iklan

Leave a Reply

iklan
error: Content is protected !!