DILI, 23 maiu 2024 (TATOLI) – Governu liuhusi Ministru Juventude,Desportu, Arte no Kultura, Nelyo Isaac Sarmernto, fó resposta pozitivu ba Prezidente World Wheelchair Rugby (WWR) Ázia, Qais Al-Dhalai ho ekipa atu estabelese federasaun Rugby iha Timor-Leste.
Iha enkontru ne’e, Ministru Nelyo husu ba Asia Rugby la’ós estabelese de’it federasaun, maibé tenke introdús mós ba Timoroan hotu ne’ebé hakarak hili modalidade ne’e hodi dezenvolve sira nia talenta iha área desportu.
“Importante federasaun hot-hotu ne’ebé hakarak rejistu tenke tuir Lei Baze Desportu ne’ebé iha no nia organizasaun tenke la’o no federasaun internasionál tenke tau matan ba dezemvolvimentu Rugby iha Timor-Leste,” Ministru Nelyo katak liuhusi nota ne’ebé Agência TATOLI asesu husi media MJDAK, ohin.
Iha okaziaun ne’e Prezidente Qais Al-Dhalai, hateten prontu dezenvolve modalidade Rugby iha Timor-Leste liu husi Federasaun Rugby Timor-Leste ne’ebé iha tempu besik sei estabelese no prontu koopera ho Governu ba dezenvolvimentu desportu ne’e.
Hola prezensa ba inkontru ne’e Evangelisto Gantry D. Santos Meilana (Assesor Exekutivu, Komunikasaun no Relasaun Publiku) no delegasaun Asian Rugby akompana husi Benjamin Van Rooyen (CEO Asia Rugby), Rodney Holt (Presidente World Wheelchair Rugby Regional Asia) no atleta Timoroan nain 2.
Jogu Rugby nia orijinalidade husi nasaun Inglaterra harí husi William Webb Ellis iha tinan 1871, iha ne’ebé nia jogu hanesan ho futeból Amerika nian, maibé nia regra halimar hadau malu bola husi liman ba liman soe ba iha markasaun iha kampo laran nune’e bele hetan pontu.
Rugby sai konesidu ba mundu hotu hatene iha tinan 1895 bainhira hamosu liga. Regulamentu jogu Rugby nian jogadór hamutuk 15 mak joga iha kampo laran númeru kamijola hahú 1-8.
Notísia relevante: Prezidente WWR Ázia hakarak estabelese federasaun Rugby iha Timor-Leste
Jornalista: Hortencio Sanchez
Editór: Florencio Miranda Ximenes
