POLÍTIKA

Komisaun D husu MF karega taxa ba kamioneta tula sasán tama fronteira

Komisaun D husu MF karega taxa ba kamioneta tula sasán tama fronteira

Karreta sira tula sasan nesesidade bazika iha area Fronteira Batugade, Munisipiu Bobonaro atu mai Timor-Leste.Imajen/Agapito dos Santos.

DILI, 23 maiu 2024 (TATOLI)—Komisaun D ne’ebé trata asuntu Ekonómia no Dezenvolvimentu iha Parlamentu Nasionál (PN) rekomenda ba Ministériu Finansa (MF) atu karega taxa ba kamioneta sira tula sasán tama hosi fronteira terrestre mai Timor-Leste.

“Rekomenda ba Ministériu Finansa atu karega taxa ba kamioneta sira-neebé tula naha ka sasán tama husi fronteira. Tanba kamioneta sira-ne’e kuandu tama mai ho naha ne’ebé todan afeta ba Estrada bele sai aat,” refere rekomendasaun ne’ebé haktuir iha relatóriu fiskalizasaun komisaun D ne’ebé Agência Tatoli asesu, kinta ne’e.

Iha fulan-marsu tinan ne’e, Komisaun D hala’o fiskalizasaun ba iha diresaun serbisu imigrasaun postu entrada Mota-Masin, diresaun serbisu komérsiu externu postu estrada Mota-Masin, diresaun Karantina postu entrada Mota-Masin, diresaun serbisu transporte terrestre Mota-Masin hodi haree besik atividade serbisu diresaun sira-nian no rona difikuldade sira.

Tan ne’e, Komisaun D mós husu bainhira kamioneta sira tama mai, se di’ak-liu sasán sira-ne’e husik hela iha fronteira hodi fó biban ba karreta lokál sira mak tula, atu nune’e bele hetan netik rendimentu ruma.

Husu MI tau atensaun ba difikuldade serbisu imigrasaun

Husi rezultadu fiskalizasaun ne’e, Komisaun D mós rekomenda ba Ministériu Interiór (MI) atu rezolve difikuldade ne’ebé enfrenta husi serbisu imigrasaun iha postu entrada Mota-Masin hanesan menus forsa traballu, fatin ka armáriu atu asegura dokumentu sira laiha no laiha fatin própriu hodi halo detensaun ba ema sira-ne’ebé tama ilegál.

Tuir informasaun ne’ebé relata husi parte serbisu imigrasaun iha postu integradu Mota-Masin katak, sidadaun sira ne’ebe tama liu husi postu entrada hanesan importadór sira ne’ebé mak importa sasán no sira bele lori ba iha Suai ou lori ba to’o iha munisípiu Ainaro no Manufahi.

Imigrasaun nia serbisu mak atu kontrola kona-ba importadór sira-nia dokumentu hanesan pasaporte iha ka lae hodi fó vistu. Liga ba karreta tula sasán ba to’o iha munisípiu sira seluk ne’e kabe ba kompeténsia instituisaun sira seluk nian.

Iha parte seluk, tuir informasaun ne’ebé haktuir husi reprezentante serbisu komérsiu externu katak serbisu ne’ebé hala’o mak foku ba exportasaun,  maibé kona-ba sasán importadu sira parte Alfandega nia serbisu.

Liga serbisu Karantina nian iha postu entrada Mota-Masin mak halo kontrolu ba sasán exportasaun no importasaun sira-ne’ebe iha autorizasaun no se laiha autorizasaun mak autoridade Karantina sei la autoriza atu esporta no mós importa.

Difikuldade ne’ebé sira hasoru mak menus rekursu umanu iha kada departamentu, tanba durante ne’e iha kada departamentu iha pesoál ida 91) de’it no fatin izolamentu ba animál bainhira Polísia Unidade Patrullamentu Fronteira (UPF) sira halo apreensaun.

Diresaun serbisu transporte terrestre postu entrada Mota-Masin liga ba lisensa ne’ebé mak diresaun transporte terrestre atribui ba kareta sira-ne’ebé halo operasaun tula nesesidade bázika sira husi Indonézia no parte transporte terrestre haktuir katak karreta sira lori sasán sira-ne’e direta ba iha negosiante sira.

Kona- ba karta lisensa ka autorizasaun, parte diresaun serbisu transporte terrestre fó guia sirkulasaun no polísia tránzitu emite xapa matríkula provizóriu.

Jornalista : Nelson de Sousa

Editór       : Cancio Ximenes

 

iklan
iklan

Leave a Reply

iklan
error: Content is protected !!