DILI, 23 Maiu 2024 (TATOLI)–Diretór Servisu Apoiu Diagnostiku no Terapeutiku iha Hospitál Nasionál Guido Valadares (HNGV), Vidal de Jesus, hateten iha trimestre dahuluk (husi janeiru-marsu 2024) ne’e HNGV rejista bebé ne’ebé moris iha ospitál ne’e hamutuk 1.381.
“Husi númeru ne’e mak bebé sira-ne’ebé moris iha HNGV,” Diretór Vidal de Jesus Lopes hateten ba jornalsita sira iha HNGV, Bidau Tokoh Baru, Dili, kinta ne’e.
Aleinde ne’ e, nia hateten, bebé sira-ne’ebé moris iha HNGV ne’e iha total mate hamtuk 76 no husi númeru ne’e mate ho perimatolojia ka moris mai ho kondisaun pezu kiik no defisiénsia hamutuk 45 no mate iha inan nia knotak (kabun laran) ka stillbirth hamutuk 31.
Bebé moris mai maibé sira-nia iis sei iha maibé to’o oras rua ka tolu mak sira hakotu iis, tanba sira nia pezu kiik no mai ho kondisaun defisiénsia.
Kauza husi bebé sira-ne’ebe mak mate iha kabun laran ne’e inan isin-rua sira la ba kontrola didi’ak bebé nia kondisaun kona-ba programa ante-natal care.
“Inan isin-rua sira ne’e hein to’o atu partus mak ba iha sentru Saude Sira dala ida, maibe sira la ba konsulta antes bebé hahú husi fulan tolu ka lima ba konsulta. Atu nune’e, bele leno bebé nia kondisaun ne’e oinsá, nune’e iha buat ruma ne’e doutór sira bele rekomenda,” nia dehan.
Bebé sira-ne’ebé mate ne’e, dalabarak mate kedas iha inan nia knotak ka kabun laran mak lori ba iha HNGV, maibé tuir lolos fasilidade saúde sira iha sistema atu kontrola.
Kauza seluk mak saúde inan nian la kontribui di’ak ba iha kresimente bebé nian iha kabun laran, entaun bebé moris tenke mate.
Jornalista : Jesuína Xavier
Editór : Cancio Ximenes
