POLÍTIKA

Komisaun C rekomenda hadi’a jestaun sítiu turístiku Ramelau-Rabilau hodi rekolla reseita

Komisaun C rekomenda hadi’a jestaun sítiu turístiku Ramelau-Rabilau hodi rekolla reseita

Sarani sira hala’o peregrinasaun ba sítiu Na’in-Feto iha Ramelau. Imajen Tatoli/António Gonçalves.

DILI, 31 maiu 2024 (TATOLI)—Komisaun C ne’ebé trata asuntu Finansa Públika iha Parlamentu Nasionál (PN) rekomenda ba Ministériu Turizmu atu hamutuk ho parte igreja hadi’a jestaun sítiu turístiku Ramelau no Rabilau hodi rekolla reseita di’ak liután ba Estadu.

“Rekomenda Governu liuhusi Ministru Turizmu presiza tuur hamutuk ho parte igreja (amu bispu) hodi rezolve kona-ba fatin turizmu relijiozu hanesan Ramelau no Rabilau nia jestaun no mós konsentra planu ba fatin turizmu istóriku balun ne’ebé bele fó reseita ba Estadu,” haktuir relatóriu fiskalizasaun komisaun C nian ne’ebé Agência Tatoli asesu, sesta ne’e.

Iha loron 08-10 Maiu tinan 2024 ne’e, komisaun C liderada hosi Prezidente Komisaun, Cedelísia Faria dos Santos, akompaña husi deputadu membru komisaun hala’o fiskalizasaun ba iha munisípiu Ainaro ho objetivu hodi rona kona-ba ezekusaun Orsamentu Jerál Estadu (OJE) ne’ebé aloka ba iha munisípiu no ba terenu hodi haree kona-ba projetu ne’ebé realiza oan husi orsamentu Estadu nian tuir programa autoridade sira munisípiu Ainaro ne’ebé aprovadu ona iha Parlamentu Nasionál.

Turizmu komunitáriu Rabilau iha Maubisse. Imajen/Racom Maubisse.

Tuir relatóriu komisaun nian, iha audisaun fiskalizasaun jestaun ba turizmu relijiozu hanesan turizmu relijiozu Ramelau nian kona-ba jestaun hanesan vizitante sira-nian kada ema ida kontribui sentavu $0,50, ne’e iha ona konflitu entre amu paróku ho administradór postu Hatubiliku, ne’ebé lori ba nasionál hodi ministru ho amu bispu tuur hamutuk hodi rezolve kestaun sira-ne’e maibé la konsege resolve to’o ohin loron.

Mezmu ohin loron movimentu ba vizita foho Ramelau fim-de-semana vizitante 600-resin, ne’ebé fatin sira-ne’e mak jere didi’ak munisípiu Ainaro bele hetan reseita ne’ebé makaas tebes.

Aleinde ne’e fatin turizmu relijozu ho naran Rabilau iha postu administrative Maubisse mós, nia estatutu hanesan foho Ramelau ne’ebé agora daudaun parókia Maubisse ho autoridade postu administrative Maubisse halo diskusaun hela kona-ba jestaun ba fatin ne’e.

Entretantu, komisaun mós hala’o vizita fiskalizasaun iha terrenu hanesan vizita direta ba iha fatin turizmu Jakarta-II (dua) komisaun haree diretamente kona-ba fatin estatéjiku ba turístiku sira ne’ebé fó reseita ba iha munisípiu Ainaro, fatin ne’e mós hanesan istóriku ba luta libertasaun nasionál ne’ebé pontensiál tebes ba turizmu hodi apoiu ba iha munisípiu liuhusi reseita, tanba ne’e Governu sentrál liuhusi Ministériu Komérsiu Indústria (MKI) bele moderniza fatin ne’e sai fatin turizmu istóriku hodi atrai vizitante ka turista sira.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!