EDUKASAUN

“Investe oan sira liuhusi edukasaun di’ak” – Rini Alves hateten

“Investe oan sira liuhusi edukasaun di’ak” – Rini Alves hateten

Kameli Timor Internasionál School selebra loron labaraik nian, iha salaun Timor Lodge, sábadu (01/06). Imajen Tatoli/Francisco Sony

DILI, 01 juñu 2024 (TATOLI) – Kameli Timor Internatinál School (KTIS), instituisaun integrada ensinu pré-eskolár privada ida iha Dili, husu inan-aman sira atu investe ba edukasaun oan sira nian.

“Ha’u husu ba inan-aman hotu iha nasaun ne’e atu investe oan sira liuhosi fó edukasaun  ne’ebé di’ak ba sira ba futuru  oin mai,” Diretora KTIS, Rini Fatmawati Alves da Cruz, dehan ba TATOLI bainhira selebra Loron Labarik iha nian  iha Timor Lodge, ohin.

Diretora Kameli Timor Internasionál School, Rini Alves da Cruz. Imajen Tatoli/Francisco Sony

Estudante na’in-30-resin hatudu sira-nia talentu iha selebrasaun ida-ne’e no marka prezensa hosi inan-aman sira, ne’ebé orgullu tebes ba oan sira.

“Iha selebrasaun ohin loron, ami hala’o atividade oioin, hanesan kompetisaun lee poezia sira, show-forma, dansa tradisionál sira, kanta, no seluktan,” nia relata.

Loron Labarik selebra tinan-tinan iha loron 1 fulan-juñu iha fatin oioin iha mundu, inklui Timor-Leste nu’udar inisiativa ba labarik sira-nia moris-di’ak no direitu.

Labarik mak fuan no klamar

Iha fatin hanesan, Reprezentante Inan-Aman, Margareta Araújo agradese ba Kameli Internasional School ne’ebé organiza selebrasaun loron Internasionál ba Labarik Sira.

“Labarik sira mak fuan no klamar husi ita-nia familia no mós komunidade. Sira lori ksolok ne’ebé laiha rohan, kuriozidade no enerjia ilimitada mai iha ida-idak nia  moris,” Margareta Araújo afirma.

Nia haklaken, hanesan inan no aman, iha responsabilidade boo’t atu proteje no kuida oan sira. Ohin mai re-afirma katak sei kontinua fó domin, apoiu no fó oportunidade ne’ebé prezisa atu oan sira hodi bele moris hanesan individu ida-ne’ebé mak konfiante, no mós kapasidade.

“Iha loron ida ohin, hamutuk ita selebra individualidade labarik sira-nia talentu, sira-nia kreatividade no sira-nia laran di’ak. Ita aproveita mós momentu ida-ne’e atu hanoin fali kona-ba valór sira ne’ebé ita hakarak fó ba oan sira. Di’ak, empatia no respeitu mak baze ba sosiedade ida ne’ebé di’ak, no husi ita-nia ezemplu mak ita-nia labarik oan sira sei aprende prinsípiu importante sira ne’e,” nia konklui.

Jornalista : Felicidade Ximenes

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!