Deputada PD husu Governu tau atensaun ba infraestrutura bázika iha Ataúro

DILI, 04 juñu 2024 (TATOLI)—Reprezentante povu iha Parlamentu Nasionál (PN) liuhusi Deputada PD, Sancha Tilman, husu parte ezekutivu atu atensaun ba preokupasaun infraestrutura báziku ne’ebé komunidade Ataúro hasoru.
Nia hateten. iha sábadu 01 juñu ne’e nia halo vizita eleitorál ba autoridade administrativa Ataúro, suku Bikeli, hasoru komunidade iha ne’eba hato’o preokupasaun kona-ba dezenvolvimentu atuál iha suku refere liuliu kondisaun Estrada ne’ebé aat.
“Komunidade hato’o preokupasaun ne’ebé sira enfrenta hanesan kondisaun Estrada. Iha kompañia balun mak kaer obra estrada, maibé halo pengerasan de’it para tiha ona, to’o agora seidauk iha kontinuasaun. Nune’e, bainhira udan-been tuun lori hotu rai-henek ateru Estrada sira-ne’e, no husik hela fatuk mesak boot lekar iha Estrada. Ida-ne’e, afeta ba transporte públiku sira hanesan motorizada no karreta kiik sira-ne’ebé labele asesu ba estrada,” nia hato’o iha reuniaun plenária Parlamentu.
Nune’e, nia husu ba Governu liuhusi Ministériu Obra Públika (MOP) atu bele tau atensaun ba preokupasaun refere hodi nune’e bele fasilita di’ak liután komunidade sira-nia asesu ba atividade oioin hodi bele sustema sira-nia moris loro-loron.
Aleinde ne’e, preokupasaun seluk ne’ebé komunidade hato’o mak eletrisidade la lakan iha oras 24 nia laran, maibé lakan de’it kada oras neen (6), entaun ida-ne’e estraga komunidade nia sasán eletróníku sira.
Iha suku Bikeli, nia dehan, komuniddae enfrenta falta bee-moos tanba komunidade só bele asesu ba bee-moos semana ida dala ida de’it.
Bainhira udan-boot akontese, dalaruma komunidade suku Bukeli labele asesu ba bee-moos no sira konsumu de’it bee-posu.
Husi parte saúde, nia dehan, postu saúde espasu la to’o ba pasiente sira no inan isin-rua sira-ne’ebé atu partu, tanba iha ne’eba suku lima kedas maibé sira só iha de’it ambulánsia ida, nune’e bainhira iha kazu urjente ruma iha tempu no oras ne’ebé hanesan sei difikulta tebes sira atu asesu ba ospitál.
Problema seluk, nia hateten, mak rede telekomunikasaun Timor Telecom iha autoridade administrativa Ataúro laiha, so iha de’it rede Telemor maibé dalaruma mós rede ladi’ak no la’o lentu tebes
“Husu ba Governu liuhusi ministériu kompetente atu bele haree no tau atensaun ba situasaun ida ne’e,” nia dehan.
Deputadu CNRT, Ricardo Baptista, sekunda ho kestaun ne’ebé nia-parte sempre foti ona kona-ba eletrisidade iha Ataúro lakan la to’o oras 24, nune’e kontinua husu ba ezekutivu atu tau atensaun ba kestaun ne’e.
Vise Ministru ba asuntu Parlamentár, Adérito Hugo da Costa, rejista preokupasaun husi reprezentante povu sira ne’e hodi bele enkamiña ba entidade tutela.
Notísia Relevante: FEDA prioritiza projetu infraestrutura iha Ataúro
Jornalista : Nelson de Sousa
Editór : Cancio Ximenes

