iklan

POLÍTIKA

Governu husu PN tau prioridade ba diskusaun proposta-lei Rejime Mobiliáriu

Governu husu PN tau prioridade ba diskusaun proposta-lei Rejime Mobiliáriu

Vise-Ministru Asuntu Parlamentár, Adérito Hugo da Costa. Imajen Tatoli/Francisco Sony

DILI, 13 juñu 2024 (TATOLI)—Vise Ministru ba asuntu Parlamentár, Adérito Hugo da Costa, husu Parlamentu Nasionál bele tau prioridade hodi halo diskusaun ba proposta-lei Rejime Jurídiku Garantia Mobiliáriu sira-nian ba Parlamentu Nasionál (PN), tanba Governu submete ona.

“Liuhusi diskusaun levantamentu diagnóstika iha setór ekonómia ho finansa nian, aprezenta ona mós lei ba Garantia Mobiliáriu nian, ne’ebé aprova iha semana rua liubá no agora submete ona iha Parlamentu Nasionál. Hein hela, PN halo konvokatóriu audiénsia públika hodi envolve entidade relevante setór finansa no ekonómia hodi bele halo diskusaun loloos atu husu sira-nia hanoin oinsá atu aprova lei ba garantia mobiliáriu, oinsá mak garantia bankária ba kréditu atu asesu ba kréditu nian,” Vise Ministru ba asuntu Parlamentár ne’e hateten liuhusi “Programa Entrevista Eskluziva” iha estúdiu Agência Tatoli, foin lalais ne’e.

Nia dehan, hein katak órgaun lejisladór avansa lalais proposta-lei ne’e, atu lei ne’e tama vigór benefísia públiku liuliu setór privadu sira-ne’ebé hakarak partisipa iha dezenvolvimentu iha setór ekonómia iha Timor-Leste.

Antes ne’e, iha 22 maiu 2024, Governadór Banku Sentrál Timor-Leste (BCTL-sigla portugés), Helder Lopes, halo ona aprezentasaun ida kona-ba proposta-lei relasiona ho Rejime Jurídiku Garantia Mobiliária sira-nian, ne’ebé Konsellu Ministru aprova ona.

Ho proposta-lei ida-ne’e, Governu iha objetivu atu kria ambiente ida-ne’ebé favoravél ba investimentu privadu no liuhusi dalan ne’e, atu hasa’e dezenvolvimentu ekonómiku País nian.

Maske Governu liuhusi Konsellu Ministru aprova ona maibé sei submete fali ba Parlamentu Nasionál hodi halo diskusaun hafoin aprova no haruka ba Prezidente Repúblika atu promulga.

Notísia Relevante: Governu aprova Lei Rejime Mobiliáriu ne’ebé aprezenta husi BCTL

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!