iklan

HEADLINE, INKLUZAUN SOSIÁL

INSS no BNCTL ohin halo ona pagamentu pensaun sosiál faze daruak

INSS no BNCTL ohin halo ona pagamentu pensaun sosiál faze daruak

INSS abertura pagamentu pensaun sosiál, tersa (18/06/2024), iha suku Lalisuk Pante Makasar. Imajen Tatoli/Abílio Elo Nini

DILI, 18 juñu 2024 (TATOLI)—Ministériu Solidaridade Sosiál no Inkluzaun (MSSI) liuhusi Institutu Nasionál Solidaridade Sosiál (INSS) hamutuk ho Banku Nasionál Komersiu Timor-Leste (BNCTL), tersa ne’e, hahú halo pagamentu pensaun sosiál faze daruak iha territóriu laran.

“Ohin ita hamutuk ho BNCTL hahú halo pagamentu ba pensaun sosiál ba idozu no invalidez sira iha territóriuxlaran, ne’ebé ninia prosesu pagamentu durante fulan-ida, hahú loron 18 juñu no ramata iha 22 jullu 2024,” Prezidente INSS, Arlindo Pinto, informa ba Agência Tatoli, iha ninia knaar-fatin, Caicoli, tersa ne’e.

INSS halo pagamentu ne’e ba kategória rua, simu kada fulan ba benefisiáriu sira-ne’ebé iha ona ATM no simu kada fulan-tolu ba benefisiáriu sira-ne’ebé laiha ATM mak kada fulan-tolu.

Benefisiáriu pensaun sosiál ba faze daruak iha territóriu mak hanesan tinan 60 to’o 69 sei simu $60 kada fulan, ho benefisiáriu hamutuk 28.896, benefisiáriu ho tinan 70 to’o 79 sei simu $80 kada fulan ho benefisiariu hamutuk 44.045, benefisiáriu ho tinan 80 ba leten sei simu $100 kada fulan ho benefisiáriu 15.978.

Notísia relevante : INSS fulan ne’e halo pagamentu ba pensaun sosiál faze daruak

Benefisiáriu ferik katuas inklui ema ho defisiénsia ne’ebé sei simu liuhusi Banku Komersiál sira iha Timor-Leste mak hanesan BNCTL 97.139, Banku Nasionál Ultramarinu (BNU) 222, Banku Repúblik Indonesia (BRI) 226 no Bank Mandiri 57.

Totál benefisiáriu ne’ebé simu pensaun sosiál iha faze daruak ba tinan 2024 hamutuk 97.644 iha territóriu nasionál, ho nia orsamentu $22.141.674, kompostu husi ema ho defisiénsia 8.725 (9%) no ferik katuas 88.919 (91%).

Benefisiariu ne’ebé iha konta bankária liuhusi ATM hamutuk 15.249 no simu pagamentu ho konta bankária direta hamutuk 82.395.

Alende ne’e, iha rejistrasaun foun ba benefisiáriu iha tinan 2024 hahú husi janeiru to’o marsu hamutuk 1.406, ne’ebé husi totál ida-ne’e benefisiáriu ne’ebé rejistu iha banku hodi loke ona konta bankária hamutuk 119, no benefisiáriu ne’ebé seidauk loke konta bankária hamutuk 1.287.

Benefisiáriu ne’ebé mate ona no família ne’ebé kuida benefisiáriu sei aprezenta deklarasaun óbitu ho asinatura husi autoridade suku hodi aprezenta ba BNCTL tuir regulamentu internu.

“Ami mós rejistu benefisiáriu pensaun sosiál sira-ne’ebé iha deklarasaun óbitu husi autoridade kompetente hamutuk 651, kompostu husi ema ho defisiénsia 19 inklui ferik no katuas 632,” nia informa.

Jornalista     : Arminda Fonseca

Editora         : Julia Chatarina

 

 

iklan
iklan

Leave a Reply

iklan
error: Content is protected !!