DILI, 18 juñu 2024 (TATOLI)-Ministru Justisa(MJ), Sergio Hornai, informa, MJ konkorda ona hodi atribui rai ba iha Komandu Jerál (KJ) Polísia Nasionál Timor-Leste ( PNTL), ba futuru instalasaun edifísiu Komandu Jerál no Eskuadra sira iha Dili laran.
“Ohin ha’u mai enkontru ho Komandante Jerál ho nia estrutura, nu’udar Ministru Justisa, ha’u mai atu kumpre konvokatóriu ne’ebé mai hosi Komandante Jerál hodi mai hato’o intensaun sira ne’ebé señor Komandante Jerál ho ninian estrutura motiva iha pedidu ida ne’e ninian, oinsá mak atu halo atribuisaun ba konsensaun terrenu i movél ba iha Komandu Jerál, la’ós de’it iha Kuartel Jerál ninian, maibé iha eskuadra sira liuliu iha kapitál metropolitana Dili ninian,” Sergio Hornai hateten ba jornalista sira hafoin enkontru ho Komandate Jerál no Segundu Komandante Jerál PNTL, iha Kuartel Jerál PNTL Caicoli, tersa ohin.
Governante ne’e dehan, presiza atu atribui rai ba Komandu Jerál PNTL tanba antes ne’e liuhusi Ministru Interiór halo ona dezeña ba iha edifísiu Komandu Jerál no eskuadra sira no halo levantamentu ba rai sira ne’ebé mak atu uza atu instala edifísiu sira PNTL nian ne’e.
“Ekipa Komandu PNTL ho ekipa tékniku Ministeriu Interiór inklui mós Diresaun Terras Propriedade antes ne’e halo ona identifikasaun ba rai ne’ebé mak atu instala futuru edifísiu PNTL nian. Ohin ita kontinua hodi formaliza prosesu sira ne’ebé mak antes ne’e iha ona,” nia adianta.
Autoridade governu ne’e akresenta, prosesu ida-ne’e husi autoridade lokál sira mós kolabora no presiza tebes atu halo duni.
“Ha’u hanoin PNTL tenke iha fatin ida-ne’ebé dignu atu nune’e sira bele halo servisu ida mais konfortavel, hodi nune’e bele fó atedimentu ba ita-nia sidadaun sira,” nia dehan.
Ezekutivu ne’e informa, rai sira ne’ebé mak hanesan iha área Vila Verde, Kintal Kiik, Golgota, Farol no mós iha arredór Komandu PNTL.
Nia dehan, kuandu komunidade sira mak la koopera ba rai ne’ebé identifikadu ba instalasaun futuru edifísiu PNTL nian ne’e mak aban bain rua komunidade okupante lakohi koopera entaun Estadu sei buka dalan atu rezolve.
”Kuandu iha problema ne’e ita tenke iha solusaun problema labele husik estagnadu, ita iha rai dominu públiku privadu no dominu públiku Estadu ita iha polítika lejislasaun rasik, ita iha instrumentu legál para bele orinta ita ba iha ne’ebá ,”nia afirma.
Sergio hateten, hanesan alargamentu edifisiu Komandu PNTL iha komunidade balun halo impedimentu maibé Governu husu para sira voluntariamente atu bele kolabora para ita bele fo kompensaun ida ne’ebé razoável.
“Ita iha instrumentu legál, ita hanesan estadu direitu, ema hotu hotu iha direitu atu asesu ba iha justisa mas o que certo, Estadu hakarak tenke impoin nian autoridade para tau Estadu sira nian sasan iha oin sein halo deskrimisaun ba ninian sidadaun sira. Ita tenke uza ita-nian autoridade para halo medida sira maibé ho dignu ho proporsionál,” nia hateten.
Iha fatin hanesan, Komandante Jerál Polísia Nasionál Timor-Leste, Komisáriu Jerál Polísia Henrique da Costa, Komandu PNTL konvida Ministru Justisa, Diretór jerál no ekipa téknika sira hosi parte justisa nune’e mós ekipa teknika hosi interiór ninian hamutuk ho PNTL hodi haree kona ba pedidu hirak neebe mak PNTL hatama partikularmente ba iha rai sira ne’ebé hodi instala ba futuru edifísiu sira ba polísia, hanesan Kuartel Jerál PNTL, rai ne’ebé mak atu konstrui edifísiu Vera Cruz ne’ebé lokaliza Farol no eskuadra Na’in Feto ne’ebé iha área Santa Cruz.
“Tanba ne’e mak ohin ita realiza enkontru ne’e para ekipa teknika sira depois ida-ne’e sira rona orientasaun Señor Ministru nian sira servisu hamutuk ho ita-nian parte lojístika PNTL no planeamentu nune’e mós ekipa tékniku Ministériu Interiór sira bele halo daudaun servisu sira, karik iha fatin sira ne’ebé ita identifika ona komunidade okupa sé rai ne’e rai Estadu ninian hodi uza ba nesesidade instituisaun Estadu ninian ita husu para ita-nian komunidade sira ne’ebé okupa ne’e hodi koopera ho Estadu atu nune’e bele foti rai ne’e hodi halo konstrusaun ba edifísiu Komandu PNTL,” nia konklui.
Jornalista: Natalino Costa
Editór: Rafael Ximenes de A. Belo
