Membru PN husu ME tau atensaun ba eskola menus profesór
DILI, 19 juñu 2024 (TATOLI)—Membru Parlamentu Nasionál (PN) liuhusi Deputadu FRETILIN, Antoninho Doutel Sarmento, husu Governu liuliu Ministériu Edukasaun (ME) atu tau atensaun ba eskola balun iha territóriu ne’ebé menus profesór atu hanorin estudante sira.
Notísia Relevante: Eskola balun kontinua menus profesór
“Asuntu menus profesór ba problema alunu sira hasoru, tanba la kontinua kontratu ita-nia manorin kontratadu sira hanorin iha eskola sira. Tanba ne’e, mosu preokupasaun sira husi Parlamentu iha debate hodi bolu membru Governu iha área edukasaun mai iha PN atu esplika, nune’e husu nafatin atu tau atensaun,” nia hateten ba Agência Tatoli, iha resintu Parlamentu Nasionál, kuarta ne’e.
Tanba ne’e. nu’udar reprezentante povu iha uma fukun Parlamentu Nasionál preokupa tebes ho eskola balun iha territóriu ne’ebé to’o agora menus ba manorin sira hodi afeta ba prosesu aprendizajen liuliu ba alunu sira.
Ho problema sira-ne’e, iha fulan kotuk, PN ho unanimidade fó votu ba rezolusaun ida-ne’ebé husu ba ME atu haree fila-fali problema antigu profesór kontratadu sira-nian hodi fó kondisaun ba manorin sira atu hanorin fali no labele abandona alunu sira.
“Maibé, agora rezolusaun ne’e sai, to’o ohin loron, se mninistra edukasaun seidauk konsidera rezolusaun ne’e, hanoin FRETILIN kontinua ezije hodi husu responsabilidade ministra nian atu haree, nune’e labele abandona ita-nia alunu sira,” nia hateten.
Tanba ne’e, nia dehan, tenke fó atensaun másimu ho lalais hodi kolabora ho eskola sira atu haree problema saida mak estudante sira hasoru, koloka manorin sira iha ne’e hodi fó kontinuidade hanorin atu konklui matéria sira-ne’ebé mak estudante sira hasoru.
“Solusaun mak konsidera manorin kontratadu, haruka sira ba hanorin tuir rezolusaun ne’ebé PN hasai no oinsá fó hela daudaun fatin ba sira atu hanorin. Maibé, teste ba manorin kontinua la’o ba, maibé tenke haree atu fó kondisaun ba manorin nsira iha kraik hodi fó espasu ba eskola hotu-hotu atu hanorin estudante sira,” nia hateten.
Antes ne’e, Prezidente Komisaun G ne’ebé trata asuntu Edukasaun, Juventude, Kultura no Sidadania iha PN, Armando Lopes, hateten mezmu iha informasaun katak Ministériu Edukasaun (ME) hato’o ona iha mídia kona-ba rezolusaun PN kontra dekretu-lei tolu ne’ebé vijente hela, maibé hanesan reprzentante povu seidauk hetan informasaun.
“Hanesan reprezentante povu iha PN to’o agora seidauk iha informasaun katak, iha ona desizaun ida-ne’e kontra no labele kontinua ne’e seidauk. Bainhira mai ona iha PN, Deputadu sira sei levanta,” nia hateten ba jornalista sira iha resintu Parlamentu Nasionál, kuarta ne’e.
Prezidente Komisaun G ne’e hateten, rezolusaun ne’e rezultadu husi plenária iha PN no rezolusaun ne’e Deputadu sira-ne’ebé reprezenta povu mak foti.
“Tan ida-ne’e, hanoin rezolusaun ne’e la’o ona no ami entrega ona ba Governu. Depois, rezultadu saida mak atu mosu mai, depois mak ami ko’alia,” nia dehan.
Nune’e, nu’udar reprezentante povu iha esperansa ba Ministériu Edukasaun (ME) bele fó importánsia ba rezolusaun husi Parlamentu Nasionál (PN) hodi solusiona problema antigu profesór kontratadu sira.
Notísia Relevante: Reprezentante povu hein ME tau importánsia ba rezolusaun PN
Jornalista : Nelson de Sousa
Editór : Cancio Ximenes
