BOBONARO, 25 juñu 2024 (TATOLI) – Hafoin fó apoia nesesidade bázika no meteriál desportiva ba komunidade sira, Prezidente Repúblika (PR), José Manuél Ramos Horta, tersa ne’e halo inaugurasaun hodi entrega uma ba família ida iha Hauba, suku Maliubu, postu administrativu Bobonaro, munisípiu Bobonaro.
Uma ne’e konstrui ho orsamentu estadu liuhusi programa Gabinete Apoia Sosiedade Sivíl Prezidénsia Repúblika no uma ne’e iha kuartu rua, sala ida, dapur, kompletu ho hariis-fatin, inklui loke kioske ba família kbiit laek ne’e halo negósiu.
Notísia relevante: Prezidénsia Repúblika entrega uma bá inan-faluk Francisca de Jesus
“Ha’u-nia hanoin ka filozofia, konseitu maka ne’e tenke haree ajuda mós bisnis oan ruma ke sira bele kaer, entaun halo mós kioske hodi hetan osan no halo estoke atu fa’an foos, mina no sasán oinoin ne’e, amá ho apá mak tenke halo jestaun didi’ak, labele gasta tún sa’e, tenke haree kedas kuandu estoke tún daudaun ona, ba sosa iha merkadu,” Xefe Estadu fó hanoin ne’e hafoin halo inaugurasaun.
Prezidénsia Repúblika mós apoia sasán elektrónika hanesan; televizaun no parabola hodi fasilita labarik sira aprende programa edukativu husi Ministériu Edukasaun nian ne’ebé fó sai iha kanál TVE no Rádiu Televizaun Timor-Leste.
“Ida-ne’e hanesan edukasaun programa balu, loke labarik sira-nia kakutak, programa balu sira bele aprende língua, tanba ha’u koñese timoroan balu ki’ik-oan ko’alia língua barak loos. Ha’u husu nia ko’alia koreanu, nia aprende liuhusi youtube, ko’alia ingles mós mós ona liuhusi youtube la’ós iha eskola, agora aprende tán língua Mandarin, tanba labarik nia kakutak mamar loos,” nia katak.
Benefisiária Francisca da Costa, sente kontente no agradese ba Prezidente Repúblika ho ekipa tomak tanba oferta hirak-ne’e bele ajuda hakmaan ona sira-nia susar ne’ebé sente durante tinan barak.
“Ha’u kiak, tanba maluk mós laiha tán, ha’u kontente ona, sé uluk ne’e mak ha’u araska oituan, ha’u-nia moris ne’e uluk uma taka ho hudi tahan, ikus mai taka nú-tahan, taka fali terpal, to’o ikus mai taka uma duut oan ida, ne’e mak ha’u halo modo hetan $40, ha’u hola kalen tahan 10 taka mak foin aat, tinan lima mak foin hetan uma ne’e,” nia hateten.
Enkuantu Francisca da Costa ho nia kaben Mateus da Costa hela ho ona na’in-neen kompostu husi feto tolu no mane tolu ne’ebé daudaun ne’e halo estuda iha nível ensinu báziku primeiru, segundu no terseiru siklu.
Notísia relevante: Prezidénsia Repúblika apoia família vulneravél iha Ataúro
Jornalista: Sérgio da Cruz
Editór: Evaristo Soares Martins
