DILI, 28 juñu 2024 (TATOLI)–Vise-Primeiru-Ministru (PM), Ministru Kordenador Asuntu Sosial no Ministru Dezenvolvimentu Rurál no Abitasaun Komunitária, Mariano Asanami Sabino, hateten profisionál saúde hanesan médiku, parteira no enfermeiru sira tenke kontinua espíritu eroi Guido Valadares iha sira-nia servisu atendimentu iha Hospitál Nasionál Guido Valadares (HNGV) no iha sentru no postu saúde sira.
“Ita-nia ospital ne’e ita tau ita-nia eroi Guido Valadares nia naran, atu fó nafatin espíritu ida kontinuidade ba ita hotu. Ida hola parte iha luta iha situasaun sira defísil ne’e atu ita kontinua. Iha situsaun ai-moruk laiha, sira buka rasik no buka alternativa. Sei nafatin fó esperansa kura kanek no ema sira-ne’ebé moras. Ita hakarak tutan nafatin no kuda espiritu ida-ne’e. Tanba ne’e mak tau Hospital naran Guido Valadares,” Vise-Primeiru-Ministru, Ministru Kordenador Asuntu Sosial no Ministru Dezenvolvimentu Rurál no Abitasaun Komunitária, Mariano Asanami Sabino hato’o iha nis diskursu nakait ho selebrasaun aniversariu Hospitál Nasionál Guido Valares (HNGV) ba dala 21 ho tema “Servi ho domin ho responsabilidade”, iha HNGV.
Nia esplika, naran Guido Valadares la’ós tau nara-naran de’it maibé tenke hatuur loloos valor sira eroi Guido Valadares iha ema hotu nia prátika.
“Ita fó valor ba sira-ne’ebé halo esforsu, ita fó parabéns ba xefia no to’o Cleaner sira,” nia dehan.
Iha tempu ida agora ne’e, hakarak jere di’ak rekursu natoon ho osan naton no oportunidade atu halo jestaun di’ak-liu, tanba iha apoiu solidariedade husi parseiru hanesan Cuba no Xina no ajénsia Nasaun Unida nian.
Profisionál saúde sira iha servisu exelente, tanba hosi imi mak salva ema-nia vida naruk tan, la’ós servisu ba osan ka kargu.
“Analista, mediku, parteira no enfermeiru nu’udar xamamentu no hosi fuan. Uma ida-ne’e, ita la tau uma ba ema moras, maibé ospital katak atu halo ema kontente no di’ak, tanba atu salva ema moras sira,” nia esplika.
Governante husu ba profisionál saúde sira atu halo atendimentu di’ak oinsá pasiente sira bele hamnasa.
“Halo pasiente atu nia labele haluha. Pasiente tenke sente no dehan doutor ida-ne’e mak salva ha’u, parteira ne’e mak akompaña ha’u,” nia dehan.
“Iha ita-nia fuan tenke sai doutor atu salva ema-nia vida, parteira tenke fó esperansa ba inan ne’ebé iha kosok oan iha knotak atu moris mai di’ak, kuzineiru ne’ebé tein hahan saudavel no di’ak,” nia hateten.
Asanami hosu mós ba kargu xefia sira atu labele servisu kumpre oras no orden de’it, maibé tenke iha ajuda mutua hosi cleaner ba to’o jardineiru sira.
“Ema ne’ebé servisu iha (HNGV) ne’e, tanba vokasaun, fuan ho fuan mak ita hasoru malu iha ne’e,” nia dehan.
Jornalista : Jesuína Xavier
Editór : Cancio Ximenes
