iklan

INTERNASIONÁL

AUG 2024: Manán Brunei 11-0, TL sei hasoru Indonézia iha semi-finál

AUG 2024: Manán Brunei 11-0, TL sei hasoru Indonézia iha semi-finál

Rezulatdu jogu futsal iha eventu rejionál ASEAN University Games (AUG) 2024. Imajen/Espesiál.

DILI, 29 juñu 2024 (TATOLI)–Ekipa Timor-Leste ho naran istimadu Lafaek susesu iha nia jornada da-rua ba jogu futeból futsál kontra adversariu Brunei Darusalam ho rezultadu 11-0 iha eventu rejionál ASEAN University Games (AUG) 2024 ne’ebé realiza iha Surabaya Indonézia.

Jogu ba ekipa rua realiza sesta (28 juñu) kalan iha Surabaya Indonézia, iha ne’ebé armada Lafaek halo presaun ne’ebé makaas to’o ikus Brunei tenke rende ho rezultadu ne’ebé signifikativu.

Husi vitoria ne’e, lori ekipa Timor-Leste sei ba kompete ho Indonézia ne’ebé hanesan ekipa uma-na’in iha jogu semi-finál bainhira manán sei ultrapasa ba finál, maibé kuandu lakon sei kompete fali iha jogu ikus hodi buka terseiru lugár.

Jogu semi-finál entre Timor-Leste no Indonézia sei realiza iha sábadu (29 juñu) kalan ne’e, iha Surabaya Indonézia.

Sekretariu Jerál Assosiasaun Futsál Timor-Leste (AFTL) ne’ebé akompaña ekipa Timor-Leste ba eventu ne’e, Fernando Baptista hatete, jogadór sira iha vontade ne’ebé di’ak hodi hatudu jogu ne’ebé bonitu ikus bele manán Brunei ho rezultadu ne’ebé boot.

“Ita-nia jogadór sira hatudu jogu ne’ebé mak di’ak tebes. Loos, iha jogu primeiru ita kontra Tailándia ne’e ita derrota 3-0, maibé jogadór sira hakaas aan fali hasoru Brunei mak ita manán ho rezultadu boot. Agora ita prepara hela atu nune’e orsida lorokraik ne’e ita hasoru fali Indonézia iha semi-finál,” Fernando hateten ba Agência TATOLI liuhusi WhatsApp, sábadu ne’e.

Rezulatdu jogu futsal iha eventu rejionál ASEAN University Games (AUG) 2024. Imajen/Espesiál.

Antes ne’e, iha 21 juñu 2024, Ministru Juventude, Desportu, Arte no Kultura (MJDAK) Nelio Isaac Sarmento halo despedida ba Kontijente Timor-Leste ba Eventu AUG 2024 ne’ebé realiza iha Surabaya no Malang, Indonézia.

Kontijente Timor-Leste ne’e lidera husi Federasaun Desportu Akadémika Timor-Leste (FDA-TL) ho totál atleta, treinadór no ofisiál hamutuk ema na’in-48.

Iha ámbitu despedida ne’e, Ministru Nelio Isaac orgullu ho prezensa atleta sira-ne’ebé kompete iha AUG no nia husu labele buka manán de’it maibé oinsá buka aprende inklui hatudu dixiplina no respeita hodi reprezenta Timor-Leste ba mundu.

“Orgullu ho ita-boot sira-nia prezensa atu ba tuir kompetisaun iha Indonézia. Espera katak ita-boot sira ba iha ne’eba labele buka manán de’it maibé tenke buka aprende mós, ida-ne’e mak importante no reprezenta Timor-Leste ba mundu ida-ne’e. Atu hatudu ba imi-nia alin sira oinsá mak bele dezenvolve liutan Federasaun Desportu Akadémika iha Timor-Leste,” Nelio tatoli ba kontijensia Timor-Leste antes aranka.

Atleta hirak ne’e, maioria estudante no inklui treinadór mai husi Universidade sira mak hanesan, UNTL, DIT, UCT, UNITAL, UNPAZ, kompostu husi modalidade hanesan futsal, taekwondo, voleiból praia, xadres no atletizmu.

Atleta Atletizmu preparadu

Alende ne’e, atleta husi modalidade atletizmu, Felisberto De Deus preparadu atu kompete iha eventu ne’e no sei hatudu rezultadu ne’ebé pozitivu.

“Ami agora foin to’o iha Kupang, agora atu aranka ona ba Surabaya. Ha’u-nia parte prontu ona, preparadu atu kompete, maske iha eventu ne’e atleta sira-ne’ebé kampiaun iha SEA Gasem mós kompete hotu. Maibé ha’u la tauk, ita kompete ba mak haree,” Felisberto hateten ba Agência TATOLI via WhatsApp.

Nia dehan, tuir orariu ne’ebé iha atletizmu sei kompete hahú loron 03-06 fulan-jullu, nune’e sei kompete iha kilometru lima to’o kilometru 10.

“Ho kilometru ne’ebé iha, ba ha’u normál, maibé ami kompete ho atleta ne’ebé kampiaun ba SEA Games ne’e mak halo ha’u sente difisíl uitoan, maibé ami koko sorte de’it,” Felisberto hateten

Enkuantu orariu ba jogu AUG hahú 26 juñu to’o 06 jullu tinan 2024 ne’ebé kompete husi atleta kada Universidade iha nasaun membru ASEAN sira hotu hanesan Indonézia, Malázia, Thailandia, Singapura, Myanmar, Brunei Darusalam, Vietnam, Filipina, Laos, Kamboja no Timor-Leste.

Jornalista : Hortencio Sanchez

Editór       : Cancio Ximenes

iklan
iklan

Leave a Reply

iklan
error: Content is protected !!