iklan

INTERNASIONÁL

Singapura husu TL halo espansaun ba investimentu

Singapura husu TL halo espansaun ba investimentu

Ministru Negósius Estranjeiru no Kooperasaun (MNEK), Bendito dos Santos Freitas, hala’o vizita ofisiál dahuluk ba Singapura hodi hametin liután relasaun bilateral hodi hasoru malu ho Primeiru-Ministru Singapura Lawrence Wong. Imajen/Mídia MNEK.

DILI, 29 juñu 2024 (TATOLI)-Ministru Negósius Estranjeiru no Kooperasaun (MNEK), Bendito dos Santos Freitas, hala’o vizita ofisiál dahuluk ba Singapura hodi hametin liután relasaun bilateral hodi hasoru malu ho Primeiru-Ministru Singapura Lawrence Wong.

Iha sorumutu ne’e, ko’alia kona-ba kooperasaun ekonómia, komersiál no investimentu, maibé Xefe Governu Singapura ne’e husu ba Timor-Leste atu halo espansaun ba investimentu.

“Xefe Governu Singapura, Lawrence Wong husu Governu Timor-Leste halo espansaun ba investimentu no indústrializasaun manufatura, tanba ne’e bele fó serbisu ba joven sira,” Ministru Bendito hateten liuhusi nota ne’ebé Agência TATOLI asesu husi mídia MNEK, sábadu ne’e.

Nia dehan, Singapura fó hanoin katak área prioritária seluk ne’ebé presiza atu dezenvolve di’ak liután mak hanesan indústria turízmu no ospitalidade, peska no agrikultura, edukasaun no seluk tan.

Primeiru-Ministru Singapura, Lawrence Wong manifesta tebe-tebes ninia apoiu jenuínu ba Timor-Leste, no enkoraja Governu Timor-Leste atu halo promosaun investimentu barak liutánba potensialidade ne’ebé iha, hodi trai investor sira ba investe iha Timor-Leste, nune’e bele tulun dezenvolvimentu ekonómiku rai laran.

Entretantu, enkontru bilateral ne’e hala’o iha Ministériu Negósiu Estranjeiru Singapura nian, no akompañadu husi Embaixadór Timor-Leste ba Singapura, Alex Tilman, Xefe Gabinete MNEK, Filomeno Rómulo Lay no seluk tan.

Antes ne’e, ne’e Governu Singapura hato’o prontidaun hodi apoiu dezenvolve Timor-Leste nia ekonomia, atu nune’e bele sai membru ba Organizasaun Sudeste Aziátiku (ASEAN-sigla inglés).

Nia hato’o nia prontidaun ne’e liuhusi enkontru bilaterál entre antigu Ministru Negósiu Estranjeiru no Kooperasaun Timor-Leste, Dionísio Babo Soares bainhira hasoru malu ho nia omologu Ministru Negósiu Estranjeiru Singapura, Balkrishan Vivian.

Durante enkontru ne’e, lider rua ne´ebé tutela ba iha área exteriór ne’e ko´alia liu ba iha asuntu kooperasaun bilaterál ne’ebé mak nasaun rua ne’e estabelese ona, liuliu iha área dezenvolvimentu kapitál umanu.

Jornalista : Hortencio Sanchez

Editór        : Cancio Ximenes

iklan
iklan

Leave a Reply

iklan
error: Content is protected !!