iklan

INTERNASIONÁL

TL-Singapura asina ona akordu vistu lívre

TL-Singapura asina ona akordu vistu lívre

Ministru Negósiu Estranjeiru no Kooperasaun (MNEK), Bendito dos Santos Freitas, reprezenta Governu Timor-Leste, ofisialmente selebra tan akordu ida ho Governu Singapura kona-ba aplikasan vistu lívre durante loron 30 ba passaporte servisu, komún no diplomátiku. Imajen/Mídia MNEK.

DILI, 29 juñu 2024 (TATOLI)—Ministru Negósiu Estranjeiru no Kooperasaun (MNEK), Bendito dos Santos Freitas, reprezenta Governu Timor-Leste, ofisialmente selebra tan akordu ida ho Governu Singapura kona-ba aplikasan vistu lívre durante loron 30 ba passaporte servisu, komún no diplomátiku.

Akordu ne’e asina ho omólogu Ministru Negósius Estranjeiru Singapura, Vivian Balakrishnan, hafoin remata enkontru bilateral, iha edífiu MNE Singapura, foin lalais ne’e.

“Iha Singapura, asina mós akordu kona-ba ijensaun de vistu ba passaporte diplomátiku, passaportes servisu no passaportes komún. Ligasaun Timor-Leste ho Sinapura, ida-ne’e importante atu tulun ita-nia komunikasaun, ita-nia ligasaun vizita ka mobilidade ita-nia sidadaun Timor-Leste bele mai iha Singapura no Singapura mós bele ba Timor-Leste, haree ba parte investimentu nian,” Ministru Bendito hateten liuhusi nota ne’ebé Agência TATOLI asesu husi mídia MNEK, sábadu ne’e.

Ministru ne’e dehan, Governu Singapura manifesta tebes sira-nia prontidaun atu tulun Governu Timor-Leste iha aspetu kapasitasaun rekursu umanu no seluk tan.

“Singapura loke odamatan ita prepara aan didi’ak, ita-nia kuádru sira, ita dezeña planu ba kapasitasaun rekursu umanus bele komunika mai Singapura, tanba Singapura prontu atu simu sira atu bele tuir formasaun iha área espesífika ne’ebé presiza tuir ita-nia nesessidade estadu nian,” nia dehan.

Iha enkontru ne’e, Ministru Bendito ho nia omólogu ko’alia mós kona-ba konetividade transporte aero entre Timor-Leste ho Sinagpura, no possibilidade ba futuru sei aumenta tan frekuénsia voo entre Dili no Singapura, tanba oras ne’e dadauk, aviaun Aero Dili mak halo hela operasaun semana ida dala ida.

Alende ne’e, Ministru Vivian Balakrishnan dezafia Governu Timor-Leste atu tau prioridade ba kapasitasaun rekursu umanu nu’udar polítika Estadu, tanba ne’e nesessidade fundamentál nasaun no liu-liu partisipasaun Timoroan sira-nian iha prosesu dezenvolvimentu nasionál.

Tanba ne’e, Ministru Bendito mós hato’o agradesimentu ba Governu Singapura nia apoiu ba Timor-Leste dezde inísius iha restaurasaun independénsia to’o ohin loron, no mós kooperasaun ne’ebé sei kontinua to’o ohin loron iha área ekonomia, kapasitasaun rekursu umanu liu husi programa stars no seluk tan.

Entretantu, enkontru bilateral ne’e entre Xefe Diplomasia Timor-Leste ho Sinapura ne’e, hala’o iha Ministériu Negósiu Estranjeiru Singapura nian, no akompañadu husi Embaixadór Timor-Leste ba Singapura, Alex Tilman, Xefe Gabinete MNEK, Filomeno Rómulo Lay no seluk tan.

Antes ne’e, iha vizita ofisiál Ministru Bendito nian ba Tailándia, iha loron 22 fulan-juñu foin lalais ne’e, asina mós akordu ho Governu Tailándia kona-ba aplikasaun vistu lívre ba passaporte komún durante loron 30 nia laran.

Jornalista : Hortencio Sanchez

Editór        : Cancio Ximenes

 

iklan
iklan

Leave a Reply

iklan
error: Content is protected !!