DILI, 11 jullu 2024 (TATOLI)—Segundu Vise ba Jestaun Merkadu Manleuana, Elvino Mario dos Santos, hateten iluminsaun públiku iha merkakdu Manleuana hamutuk 34 ne’e maiória la funsiona iha tempu kalan.
“Husi iluminaaun hirak ne’e, hela lampu rua de’it mak funsiona, maibé iluminasaun seluk ne’e aat entaun iha tempu kalan ne’e halo merkadu sai nakukun,” jestór ne’e hateten ba Agência Tatoli, ih Manleuana, kinta ne’e.
Nia sujere ba Governu se hadi’a iluminasaun iha merkadu manleuana, tenke tau lampu sira ne’ebé iha kualidade hanesan iha dalan públika atu evita aat sedu iha futuru.
Jestaun merkadu halo ona proposta hodi entrega ba iha Governu maibé to’o agora seidauk iha resposta hodi bele hadi’a iluminasaun hirak ne’e.
Diretór Servisu Munisipál Jestaun Merkadu no Turizmu iha Autoridade Munisipiu Dili (AMD), Arthur Henriques, hateten autoridade munisípiu Dili iha ona planu atu hadi’a iluminasaun iha merkadu Manleuana.
“Ami iha pedidu ba Eletrisidade de Timor-Leste, Empreza Públiku (EDTL, E.P) atu fó apoiu. Pedidu ne’e ba Governu atu haree merkadu Manleuana,” nia hateten.
Jornalista : Jesuína Xavier
Editór : Cancio Ximenes
