DILI, 30 jullu 2024 (TATOLI)—Deputadu PLP iha Parlamentu Nasionál (PN), Helder Freitas “Kamarudi”, husu autoridade kompetente atu halo investigasaun ba joven aida deskonfia asesu arma ka pistola hodi ameasa komunidade iha suku Gariwai, aldeia Uatu-Ua, postu dministrativu Baucau Villa, munisípiu Baucau foin lalais ne’e.
“Semana kotuk, ha’u viajen ba munisípiu Baucau simu informasaun ida iha loron 14 Jullu 2024, iha tuku 21h00 kalan, joven ida uza pistola ba ameasa komunidade suku Gariwai. Joven ne’e, daudaun ne’e polísia detein ona maibé pistola ne’e la hatene se nian. Maibé, to’o ikus, kaer ba investigasaun, nia informa ba polísia katak pistola ne’e polísia nian. Maibé, tuir loloos regra bainhira serbisu polísia sira bele lori pistola no sai husi serbisu pistola ne’e hela iha kantor maibé derrepente de’it nia subrinu rasik kaer fali pistola ba ameasa populasaun ate to’o tiru,” nia levanta liuhusi reuniaun plenária komisaun permanente iha PN, tersa ne’e.
Tanba ne’e, nia husu ba reprezentante Governu liuhusi Vise Ministru ba asuntu Parlamentár atu enkamina ba Ministériu Interiór, atu presiza investiga ho didi’ak hodi prosesu tuir dalan legál ne’ebé iha tanba nia la’ós membru polísia.
“Ida seluk, ka’er pistola ne’e tuir loloos pistola iha karegadór ida no bala musan 10, labele liu karregadór ida ka rua, mais derpente de’it mosu iha joven nia liman karregadór haat (4), Ida-ne’e mak deskonfia pistola ne’e ninia tiu nian ka keta seluk, Karregór ne’e, nia foti husi ne’ebé. Ida-ne’e mak problema komunidade ezije informa mai ha’u katak, levanta iha ne’eba hodi halo investigasaun, keta halo pistola ne’e ilegál ka mai husi ne’ebé, nia tiu ne’e bele entrega fila-fali,” nia dehan.
Vise Ministru ba asuntu Parlamentár, Adérito Hugo da Costa, rejista akontesimentu ne’e no sei envia ba Ministériu Interiór atu halo investigasaun kle an liga ho ema sivíl uzu arma, no hein katak investigasaun ne’ebé iha hodi bele hatene motivu joven ida-ne’e bele asesu ba arma, tanba iha regra atu uza inklui hetan kartus ne’ebé liuhusi númeru ne’ebé reguladu.
Jornalista : Nelson de Sousa
Editór : Cancio Ximenes
