DILI, 30 jullu 2024 (TATOLI)—Centro Quesadhip Ruak (CQR), tersa ne’e, despede traballadór na’in-tolu ne’ebé antes ne’e hasai kursu lian Japaun, hodi bá serbisu iha Japaun, iha loron 01 agostu tinan ne’e.
“Ha’u husu ba ha’u-nia estudante na’in-tolu, bá serbisu didi’ak, Japaun iha disiplina maka’as, primeiru pontualidade hadeer sedu toba tarde, ita iha Timor ne’e toba tarde hadeer mós tarde, iha ne’ebá lae. Segundu kultura iha ne’ebá, respeitu ne’e maka’as, entaun ha’u husu ba ita-boot sira atu tau nafatin iha laran buat hotu-hotu ne’ebé apreende iha ne’e ba aplika iha Japaun. Ema dehan ita só kuu buat ne’ebé ita kuda, ita kuda di’ak ita sei kuu di’ak se ita kuda ladi’ak ita kuu mós ladi’ak,” Fundadór Centro Quesadhip Ruak, Taur Matan Ruak, fó hanoin ba traballadór sira, iha salaun Quesadhip Taibesse.
Nia husu ba joven sira ne’e atu respeitu ema ne’ebé fó serbisu hanesan mós família rasik.
“Imi hotu ne’ebé kontribui imi hotu ne’ebé ajuda se imi fó rezultadu ne’ebé di’ak, sira sei nafatin fó apoiu imi. Tantu iha ne’e no iha ne’ebá, serbisu didi’ak esforsu maka’as halo amigu di’ak atu imi-nia serbisu bele susesu. Entaun ne’e oportunidade di’ak ba ha’u-nia oan sira, ba aproveita ho másimu tanba oportunidade mai dala-ida de’it la mai dala-rua, entaun ita tenke aproveita no haree saida mak tuir mai ita prepara-an ba ida-ne’e, ne’ebé parabéns ba ita-boot sira, agradese ba JICA nia esforsu,” antigu Primeiru-Ministru hameno.
Biban ne’e, nia apresia ba mestre ne’ebé dedika nia tempu tinan lubuk ida iha sentru atu tau-matan ba estudante sira.
“Ita bele dehan susesu boot tanba sentru nia ema no estudante sira hamutuk 17 mak bá ona Japaun, ne’e barak. Ne’ebé ne’e hanesan loke dalan ba ema sira seluk ne’ebé tuir mai,” Taur orgullu.
Notísia relevante : Formandu Sentru Queshadip Ruak 30-resin servisu iha Korea
Biban ne’e, Fundadór Centro Quesadhip Ruak enkoraja joven sira ne’ebé tuir mai atu apreende iha sentru no kontinua apreende nafatin no beibeik, labele baruk.
“Agradese ba embaixadór Japaun iha Timor-Leste ba esforsu no kontribuisaun ida-ne’e, agradese mós ba ita-nia Governu Timor-Leste,” nia tenik.
Embaixadór Japaun iha Timor-Leste, Tetsuya Kimura, hateten, ekipa selesionadu sei arranka iha loron 01 agostu ne’e.
“Ha’u hakarak hato’o ha’u-nia parabéns ba juventude husi Centro Quesadhip Ruak, ne’ebé selesionadu husi grupu datoluk husi programa estajiu tékniku tinan-ida ne’e nian, ne’ebé sei arranka bá Japaun iha inísiu fulan-agostu, ha’u hakarak agradese ba Centro Quesadhip Ruak ne’ebé organiza ona serimónia despedida ida hodi despede estudante na’in-tolu ne’ebé sei bá Japaun hodi hala’o sira-nia treinamentu estajiáriu tékniku nian,” nia dehan.
Diplomata ne’e agradese mós ba kooperasaun no kontribuisaun husi Centro Quesadhip Ruak no fiar katak nakonu ho esperansa atu apreende abilidade agríkola no otelelaria durante iha Japaun no bainhira fila mai sei kontribui ba dezenvolvimentu nasaun Timor-Leste ho abilidade ne’ebé iha.
Estudante Quesadhip (traballadór) husi Lautém, Dani Nunes, agradese bele hetan oportunidade ida-ne’e hodi bele serbisu iha rai-li’ur.
“Ha’u sente orgullu tebes tanba bele hetan oportunidade ida-ne’e. Ha’u-nia esperansa mak ba ne’e serbisu no ha’u tenke esforsu maka’as atu nune’e Governu Japaun nafatin fó konfiansa no oportunidade ba joven timoroan sira hodi ba serbisu iha Japaun,” nia tenik.
Dani Nunes enkoraja maluk sira atu nafatin estuda lian Japaun ho di’ak, maski dalaruma la pasa maibé nafatin estuda no esforsu to’o loron ida bele hetan oportunidade ida-ne’e ho di’ak.
“Ha’u apreende lian Japaun iha tinan 2023, durante apreende ne’e dezafiu mak halai liu ba lian Japaun tanba lian ne’e difisil tebes, maibé manorin sira iha ne’e nafatin motiva ha’u atu aprende ho di’ak. Ami-nia kontratu ba tinan-tolu, husi empreza Kochy,” nia katak.
Traballadór na’in-lima ne’ebé sei desloka bá Japaun, iha na’in-rua frekuenta kursu ospitalidade iha sentru seluk no na’in-tolu iha área agrikultura husi Sentru Quesadhip Ruak.
Jornalista : Osória Marques
Editora : Julia Chatarina
