BOBONARO, 07 Jullu 2024 (TATOLI)-Komunidade sira iha aldeia Mude, suku Meligo, postu administrativu Cailaco, munisípiu Bobonaro, durante ne’e halerik tebes kona-bá eletrisidade no saúde.
Membru Konsellu Suku Meligo, Angelino Borges, sente kontente no agradese tanba daudaun ne’e governu hadi’ak ona estrada hodi fasilita movimentasaun karreta ho motorizada.
Maibé nia dehan, daudaun ne’e komunidade aldeia Mude sei preokupa kona-bá eletrisidade no saúde.
Tuir nia, problema eletrisidade fó impaktu ba estudante sira atu estuda iha tempu kalan.
Notísia relevante: EDTL finaliza ona projetu liña eletrifikasaun komunitária tolu iha Bobonaro
“Estudante iha kalan tuku kamí, sunu de’it ahi-oan, ami la asesu ne’e kleur ona, dezde ukun-an to’o agora ahi la tama, bainbain ami hatama surat, mai sukat tiha ona, dehan atu dada, to’o agora seidauk dada,” nia informa ba jornalista sira iha Cailaco.
Nia hatutan, atu asesu ba fasilidade saúde obrigadu komunidade sira tenke la’o ain ho distánsia ne’ebé dook tebes.
“Ema moras ne’e tenke hulan, estrada mós ladi’ak, karreta la tama, ida-ne’e araska liu ba ema ne’ebé atu partu, balu grave mak hulan ba mate iha dalan,” Nia hateten.
Biban ne’e, komunidade Emília da Costa Soares, rekomenda ba Ministériu Saúde atu konsidera preokupasaun ne’e iha tinan sira tuir mai nune’e bele fasilita komunidade sira asesu fasilidade saúde besik.
“Ami presiza duni, tanba uluk ema moras iha-ne’e ami leba de’it ba to’o iha Samutaben mak sei tula ba karreta, tanba atu ba Asalau dook tebes,” nia informa.
Xefe aldeia Mude, Rui Avelino, dehan proposta kona-bá eletrisidade hato’o ona ba parte kompetente iha tempu hirak liubá, maibé seidauk iha rezultadu, to’o agora komunidade sei iha nakukun laran.
“Ami-nia komunidade iha-ne’e uza de’it lampu, dalaruma ami haan hamutuk lampu tau iha leten, laho mai book monu-tun,” nia katak.
Kona-bá setór saúde, Xefe aldeia ne’e dehan, governu estabelese ona postu saúde iha Asulaun parte Kakeu-laran, maibé atendimentu saúde mak seidauk másimu.
“Ema serbisu ne’e mak ida de’it, ne’ebé ami-nia hakarak ne’e semana ida halo postu atendimentu iha-ne’e nune’e rai netik ai-moruk, ema atu partu mós lori netik ba tau iha-ne’ebá ambulánsia mai tula, maibé durante ne’e sira la mai vizita ida, ida-ne’e mak ha’u hanesan xefe aldeia preokupa tebes,” nia akresenta.
Tuir dadus totál komunidade iha aldeia Mude hamutuk 976 kompostu husi mane 496, feto 479 no uma-kain 227.
Notísia relevante: Uma-ka’in 6.196 iha Bobonaro seidauk asesu eletrisidade
Jornalista: Sérgio da Cruz
Editór: Evaristo Soares Martins
