DILI, 08 agostu 2024 (TATOLI)–Supervaizor empreza Montana Di’ak Unipesoal Lda, Domingos Pereira, hateten, reabilitasaun estarada rotunda Estátuta Prezidente Repúblika Nicolau Lobato Comoro ba Tasi-Tolu ne’e, agora falta de’it nahe pavimentu iha tortoar estrada nian hodi konklui obra.
Notísia Relevante: Reabilitasaun toilet públiku iha merkadu Taibesi atinje ona 85%
Empreza konklui ona reabilitasaun estrada hanesan fui alkatraun, konstrui baleta no tortoar iha Estrada ne’e nia ninin, no to’o agora atividade nahe pavimentu ne’e mós metade nahe hotu ona maibé hela de’it mak metade pavimentu tortoar estrada sorin-sorin ka ninin no taka bee-dalan nia matan ne’ebé husik hela.
“Hela media line atu hadi’a no nahe pavimentu torotar nian iha estrada sorin-sorin. Ami mos sei halo limpeza ba alkatraun iha estrada ninin sira-ne’e,” Supervizór empreza Montana Di’ak Unipesoál, Lda, Domingos Pereira, hateten ba Agência TATOLI iha rotunda Comoro.
Tuir nia, empreza presiza tan de’it loron tolu ka haat atu termina obra reabilitasaun, tanba serbisu ida hela ne’e uituan de’it hodi serbisu-na’in sira halo.
“Obra atinje ona 85% husi totál reabilitasaun ba estrada no nahe pavimentu ba estrada ninin. Tanba ne’e, hela 15% ne’e serbisu natoon no kmaan-kmaan de’it,” nia dehan.
Jornalista : Jesuína Xavier
Editór : Cancio Ximenes
