DILI, 20 agostu 2024 (TATOLI)—Fundasaun Universidade Orientál Timor-Lorosa’e (UNITAL) sei fó pose ba Reitór interinu, António Guterres, iha tempu badak hodi troka Reitór sesante, Joaquim de Jesus Vas.
Joaquim de Jesus Vas simu pose iha loron 19 juñu 2024 ba períodu 2024-2027, maibé tanba mosu preokupasaun barak husi estudante sira kona-ba nível akadémiku, nune’e parte fundasaun prefere troka Reitór foun.
“Ne’ebé agora ne’e ami iha ona Reitór ne’ebé ho nível doutoramentu, ami reuniaun hotu no konkorda hotu para depois bele fó pose,” Prezidente Fundasaun UNITAL, Cornélio Ximenes ‘Maunana’, informa ba Agência Tatoli, hafoin partisipa iha komemorasaun loron FALINTIL ba dala-49, iha Kuartel Jenerál, Fatuhada, tersa ne’e.
Maunana dehan, daudaun ne’e prosesu ensinu aprendizajen iha UNITAL la’o hela.
“Ami fó pose ba Reitór UNITAL iha fulan-rua kotuk maibé sira-ne’e liuhusi Ministériu Ensinu Superiór, Siénsia no Kultura no nia mós aprezenta nia dokumentu katak nia mestradu no ministériu fó nia avaliasaun katak bele, nune’e bele asina diploma no fó gradua, depois hirak ne’e hotu publika ona iha jornál repúblika,” nia haktuir.
Notísia relevante : Estudante UNITAL husu MESSK tau atensaun ba reitór nia grau akadémiku
Aleinde ne’e, Reitór ne’e mós hala’o ona nia atividade iha UNITAL, maibé estudante sira hato’o preokupasaun liuhusi konferénsia imprensa.
“Entaun, ha’u hateten ba Reitór, ha’u nu’udar Prezidente Fundasaun, ha’u husu atu ita fó ita-nia dokumentu sira haree, entretantu grupu estudante nafatin kria in-estabilidade no prosesu aprendizajen para hotu. Entaun ha’u dehan ba sira se imi kontinua halo ida-ne’e, ha’u haruka Polísia atua,” nia haktuir.
Antes ne’e, Prezidente Fundasaun no Reitór sesante halo ona reuniaun, ikus mai admite katak la’ós nível mestradu maibé pós-graduasaun.
Nune’e, momentu ne’ebá kedan Prezidente Fundasaun konfirma ho Universidade Nasionál Timor-Lorosa’e (UNTL) kona-ba nível edukasaun no konfirmadu katak Reitór sesante daudaun ne’e hala’o estudu pós-graduasaun iha área saúde nian.
Iha fatin ketak, Konselleiru Fundação de Aswa’in Timor-Lorosa’e (FUNATIL), Lere Anan Timur, hateten, FUNATIL hamutuk deside nomea Reitór interinu.
“Ami Konselleiru sira hamutuk deside no hili Vise-Reitór Asuntu Akadémiku, António Guterres sai Reitór UNITAL interinu durante fulan-tolu molok fundadór sira tuur hamutuk hili Reitór foun,” Lere katak.
Biban ne’e, nia husu ba estudante sira hodi hakmatek no labele partidariza universidade tanba universidade ne’e harii husi veteranu sira.
“Universitáriu sira tenke hakmatek, importante labele familiariza, labele partikulariza universidade no ema ida labele partidariza universidade, universidade ne’e tenki diferente, ema barak kiak tanba funu. Tanba ne’e, ami loke universidade ne’e ba ema kiak sira,” Lere Anan Timur, fó hanoin.
Nia dehan, bainhira la prense kritériu, dalan di’ak liu maka troka hodi tau fali ema seluk ne’ebé prense kritériu tanba universidade prodús doutoramentu barak, tanba ne’e bele uza hodi dezenvolve universidade.
“Profesór sira tenke kualidade, hanorin ho di’ak, ha’u-nia alin Joaquim de Jesus Vaz, nia nu’udar timoroan, nia mós fó nia kontribuisaun ba universidade, ita la despreza nia maibé ita serbisu tuir kritériu, norma, no lei. Se la prense kritériu, lalika kontinua atu labele tau estudante atus ba atus ne’e sai vítima ba nia hahalok, UNITAL iha doutór barak ne’ebé bele uza hodi lori universidade ba oin,” nia deklara.
Konselleiru FUNATIL husu ba ema hotu iha UNITAL atu serbisu hamutuk hodi lori universidade ba oin.
“Labele fahe malu, hatudu fraternidade umana, maun ho alin nafatin, labele fahe malu hanesan uluk, buat ruma ladi’ak, halo diálogu hodi rezolve, tanba universidade ne’e harii ho ruin no ran, harii husi veteranu na’in-lima, hafoin konvida sira seluk mai apoia, to’o loron ida ita sei hanaran nia sai universidade veteranu para mundu bele koñese,” Lere katak.
Jornalista : Osória Marques
Editora : Julia Chatarina
