DILI, 20 agostu 2024 (TATOLI)–Ministru Administrasaun Estatál (MAE), Tomás do Rosário Cabral, hateten sarani ka pregerinu husi dioseze iha provinsia Nusa Tengara Timur (NTT) ka Kupang-Indonézia ne’e hamutuk 1.100 mak sei mai partisipa misa solene ne’ebé Papa Francisco prezide iha Tasi-Tolu, loron 10 setembru 2024, iha tuku 16h30 lorokraik.
Notísia Relevante: Papa Francisco sei prezide misa solene iha Tasi-Tolu iha 10 setembru
“Dioseze Atambua iha ema hamutuk 800, Dioseze Kupang ho Flores hamutuk ema hamutuk 300 tuir rezultadu enkontru iha Jakarta,” Ministru Administrasaun Estatál (MAE), Tomás do Rosário Cabral, hateten ba jornalista sira iha Ministériu Finansa.
Governante ne’e dehan, peregrine husi dioseze rua iha NTT ne’e sei mai hasoru komisaun atu konfirma ema hira mak atu sira haruka mai Timor-Leste hodi partisipa misa iha vizita pastorál Santu Padre nian.
“Reprezentante dioseze rua iha NTT sei mai hasoru ha’u iha kuarta-feira ne’e, atu hatene ema sira mak prepara atu haruka mai,” nia dehan.
Husu konaba preparasaun Timor-Leste nian ba simu ema peregrinasaun sira hodi tuir misa solene iha Tasi-Tolu, governante ne’e hatán, Timor-Leste preparadu atu simu peregrinu sira husi Indonézia no Austrália.
“Ita preparadu, tanba ita haree hela fatin tuir númeru ne’ebé sira uluk fó ne’e. To’o ikus númeru sira-ne’e hamutuk ema 1.100,” nia hateten.
Notísia Relevante: Infografia: Vatikanu lansa ona oráriu Papa Francisco hala’o vizita pastorál iha Timor-Leste
Jornalista : Jesuína Xavier
Editór : Cancio Ximenes
