DILI, 22 agostu 2024 (TATOLI)–Vise-Ministru Administrasaun Estatál (MAE), Jacinto Rigoberto de Deus, hateten komemorasaun loron konsulta populár ba dala 25 ho tema ”Povu mak Funu! Povu mak terus! Povu mak manan Funu! Povu mak eroi boot ba ukun rasik aan!” ne’e festa povu nian no sei selebra iha postu administrativu sira iha territóriu iha 30 agostu 2024.
“Preparasaun ne’e la’o hela, tanba 30 agostu ne’e festa povu nian tanba sira mak deside ukun rasik aan. Tan ne’e, Primeiru-Ministru sempre hateten beibeik katak Povu mak eroi, tanba sira mak lori pregu ba tuu. Ita tinan 25, povu nia luta no determinadu ba ukun rasik aan,” Vise- Ministru Administrasaun Estatál, Jacinto Rigoberto de Deus, ba Agência Tatoli, iha Tasi-Tolu, kinta ne’e.
Governante ne’e esplika, komisaun organizadora prepara programa lubuk ida hahú husi 28 agostu ne’e Sekretáriu Jerál Nasaun Unida, António Guterres, to’o iha Timor-Leste ba vizita no enkontru ho Prezidente Repúblika no Parlamentu Nasionál, no iha marsa saudável husi pontu tolu no sei konsentra iha estadiun Díli hodi hala’o isár bandeira.
Nia dehan, Konsellu Ministru mós nomeia membru Governu ida-idak hodi destaka ba iha munisipiu no postu sira atu hala’o serimónia isár bandeira, maibé se membru Governu la to’o mak sei delega diretór Jerál no Prezidente Autoridade Munisipál hodi dirije serimónia isár bandeira.
“Programa kada postu mak hanesan balun husu misa no kari ai-funan ba matebian ka mártir sira. Tanba, iha loron 30 ne’e ema balun mate, ema kaer oho, molok dada bandeira,” nia dehan.
Iha mós diskursu fahe esperiénsia husi veteranu sira no funsionariu UNAMET sira atu joven sira bele hatene nasaun nia istória ukun rasik-aan liuhusi loron konsulta populár 30 agostu.
Hafoin isár bandeira, sei iha animasaun hanesan joga bola, sae bua-hun no selu-seluk tan.
Orsamentu ba komemorasaun loron konsulta populár ba da-25 iha tinan ne’e, Governu aloka orsamentu ba ba kada postu administrativu hamutuk $3.000.
Jornalista : Jesuína Xavier
Editór : Cancio Ximenes
