DILI, 27 agostu 2024 (TATOLI) – Jornalista Timoroan na’in tolu sei aranka ba Vaticano iha loron 28 agostu hodi halo kobertura bá Viajen Apostólica Amu Papa Francisco bá nasaun haat iha Ázia, inklui Indonézia, Papua-Nova Guiné (PNG), Timor-Leste no Singapura.
Jornalista na’in tolu ne’e mak hanesan Virginia dos Santos Silva husi RTTL, E.P, Delfim de Oliveira husi GMN, no Filomeno Martins husi Agência Noticiosa de Timor-Leste, I.P (TATOLI, I.P).
Iha enkontru (Departure Briefing) iha Sekretariadu Komisaun Organizadora Vizita Amu Papa, Sekretáriu Estadu Komunikasaun Sosiál, Expedito Dias Ximenes, husu ba jornalista na’in tolu atu halo kobertura ho didi’ak hodi habelar informasaun kona-ba Viazen Amu Papa nian ba mundu, no Timor-Leste.
“Ohin, ami fo hanoin kona-ba oinsá sira bele integra ba delegasaun Amu Papa nian,” Expedito ba jornalista sira hafoin enkontru, iha Sekretariadu Komisaun Organizadora Vizita Amu Papa, Motael, Dili, tersa ne’e.
Nia haktuir katak, jornalista na’in tolu sei reprezenta media Timor-Leste iha Roma, tanba ne’e mak nia husu atu mantein profesionalizmu durante sira-nia kobertura ba vizita Papa Francisco.
“Ita hotu hein katak, ho profesionalizmu ne’ebé sira na’in tolu iha, no kapasidade intelektuál, tékniku no profesionál ne’ebé mak sira iha bele lori sira-nia serbisu ho susesu no bele reprezenta duni media Timor-Leste iha mundu,” Expedito dehan.
Iha fatin hanesan, Ministru Administrasaun Estatál, Tomás do Rosário Cabral husu ba jornalista na’in tolu atu mantein balansu no profesionalizmu ba kobertura vizita Amu Papa.
“Tantu RTTL, E.P, GMN, no TATOLI,I.P, imi na’in tolu ba ne’e tanba interrese Estadu nian, interrese públiku nian no interrese igreza Timor-Leste ni’an … ne’ebé tenke simu responsabilidade ida-ne’e no asegura ho didiak,” Ministru Tomás tenik.
“Imi-nia kobertura ba ita ne’e importante tanba sei sai fali dokumentu ba ita,” Tomás dehan.
Governante ne’e akresenta katak halo kobertura ba vizane Amu Papa nu’udar previléjiu boot ida ba jornalista na’in tolu.
Tuir oráriu, viazen Apostólika Papa Francisco sei hahú iha loron 2 setembru no sei termina iha 13 setembru.
Viazen Amu Papa sei hahú ho Idonezia, ne’ebé mak nia sei to iha Jakarta iha loron 3 setembru to’o 6 setembru. Hafoin Indonezia, Papa Francisco sei kontinua nia viazen bá Papua-Nova Guiné entre 6 no 9 setembru. Entre 9 no 11 setembru, Sua Santidade sei halo nia vizita mai Timor-Leste no hafoin Dili, Papa Francisco kontinua kedas nia viazen ikus ba Singapura entre 11 no 13 setembru.
Jornalista: Filomeno Martins
Editór: Rafael Ximenes de Assis Belo
