DILI, 29 agostu 2024 (TATOLI)–Líder relijiozu sira inklui Reprezentante husi Ministériu Edukasaun (ME), kinta ne’e, kuda ai-oan pucuk merah, iha resintu edifísiu Institutu Superiór Filozofia no Teolojia (ISFIT) hodi hamahon ambiente estudu.
“Ohin ita kuda ai-oan haat ne’ebé kuda simbólika husi ita-nia Bispu Dioseze Baucau Dom Leandro Alves, Bispu Dioseze Maliana Dom Norberto Amaral no Reprezentante Santa Sé iha Timor-Leste, Monseñor Marco Aprizzi inklui Reprezentante Ministra Edukasaun, Edia Monteiro. Tanba ita la’ós husi natureza de’it maibé ita mós presiza kuidadu natureza hodi bele fó matak malirin no ajuda ambiente estudu ne’ebé di’ak,” Reitór ISFIT, Padre Justino Tanec, informa ba Agência Tatoli, iha resintu ISFIT Fatumeta, kinta ne’e.
Notísia relevante : PAM Bobonaro no ekipa kuda ai-oan 200 hodi konserva bee-matan iha Lebos
Objetivu husi atividade ne’e atu hanorin estudante sira oinsá hadomi natureza, ne’ebé kuda ai-oan ne’e simbólika de’it no ba oin estudante iha eskola ne’e kontinua prepara ai-oan hodi kuda tanba ai-oan ne’e fó mahon ba ambiente.
“Ita hanorin ita-nia estudante atu oinsá hadomi natureza no ida-ne’e hanorin edukasaun ba ita-nia estudante sira, liuhusi kuda oan ne’e atu fó matak ba ita-nia ambiente nune’e fresku ba eskola nune’e estudante bele uza bainhira asesu ba presesu ensinu aprendizajen,” Amu tenik.
Jornalista : Osória Marques
Editora : Julia Chatarina
