Mandati husu investiga oknum PNTL lanu entrega pistola ba ema sívil
DILI, 04 setembru 2024 (TATOLI)—Deputadu membru komisaun B ne’ebé trata asuntu Negósiu Estranjeiru no Defeza ho Seguransa iha Parlamentu Nasionál (PN), David Dias Ximenes ‘’Mandati’’, husu ba instituisaun kompetente atu halo investigasaun ba oknum Polísia Nasionál Timor-Leste (PNTL) ho deviza ajente prinsipál ida ho naran inisiál AC ho kondisaun lanu iha karaoke no entrega pistola ba ema sívil.
Notísia Relevante: Oknum PNTL ida lanu entrega fali nia pistola ba ema sivil
Oknum polísia ne’e hala’o mós Serbisu Informasaun ne’ebé destakadu iha munisípiu Dili, ne’ebé iha segunda (02/09) madrugada ne’e, fatin karaoke ida besik eskuadra polísia Dom Aleixo, suku Comoro, hemu ho kondisaun lanu depois entrega pistola ba ema sívil atu uza.
Iha fbiban ne’e, nia dehan, ema telefone ba polísia no Serbisu Informasaun Polísia (SIP) nasionál ida ba kedan fatin akontesimentu no husu ba AC katak, tanba saida mak entrega arma ba fali ema sívil, iha momentu inkéritu ne’e pistola iha hela ema sívil nia-liman no AC ho kondisaun lanu dudu monu pesoál SIP rezulta kanek grave iha ulun, no husi asaun ne’e mosu kedan dezentendimentu no pesoál SIP konsege asegura arma refere.
“Ida ne’e piór liután, serbisu intelejénsia ba lanu fali, depois fó arma ba ema seluk kaer, presiza investigasaun,” Deputadu Mandati hateten ba jornalista sira iha resintu Parlamentu Nasionál, kuarta ne’e.
Hanoin serbisu intelijénsia nia serbisu mak atu toma medida preventiva nune’e krime labele akontese, maibé ho aktu ne’e presiza investiga ba hahalok ne’e ne’ebé loloos ne’e labele akontese.
“Loloos karik, sidadaun sira detein nia no bolu polísia ba kaer nia. Labele husik de’it, tanba saida mak buat sira-ne’e akontese,” nia dehan.
Deputadu CNRT, Duarte Nunes, mós atu hato’o keixa ba aktu ne’e ba instituisaun tutela hodi halo investigasaun hodi foti medida hasoru, tanba hahalok ne’e loloos labele akontese.
Jornalista : Nelson de Sousa
Editór : Cancio Ximenes
