DILI, 09 setembru 2024 (TATOLI)—Ema-nia ulun wa’in-wa’in habai-aan iha loromatan nia okos. Sira forma tutur malu iha Estrada Faról besik tasi-ninin, iha Ministériu Petróleu no Rekursu Minerál (MPRM) nian be besik Faról hatuur ba ne’e, ema-nia ulun nakonu sena malu iha Estrada sorin-sorin.
Notísia Relevante: Rezidénsia Nunsiatura Apostólika asegura husi membru PNTL no F-FDTL
Sarani sira-nia ulun ne’e lolo haksesuk malu, hadau malu hanesan laloran tasi be lulun ba-mai hodi baku tasi-ibun, atu hakarak haree-hetan de’it Papa Francisco be atu liuhusi estrada ne’e ho looos no momoos.
Sarani nobun-nobun hamrrik ho esperansa be nakonu. Sira hein be hein, hein hahú husi tuku 10h00 daeersan to’o tuku 15h30 lorokraik la sente kolen. Bainhira Papa Francisco mosu ho karreta, tama iha sira-nia leet, \hanesan ema ida fó komandu ba sira hodi hakilar no hakalak husi rohan ba rohan.
“Viva Amu Papa, Viva Amu Papa!,” sarani sira hakilar hodi liki bandeira RDTL no bandeira Vatikanu iha anin leten, hodi simu bensaun husi Papa Francisco nia liman moruk.
Notísia Relevante: Papa Francisco to’o ona iha Aeroportu Prezidente Nicolau Lobato
“Ha’u sente entuziasmu tebe-tebes, haree Amu Papa liu iha ne’e no fó mós bensaun ba sarani sira iha ne’e. Ida-ne’e, mai ha’u orgullu tebes no grasa ida iha ha’u-nia moris tomak,” Maria Teresa espresa nia sentiment ksolok ba Agência TATOLI, hafoin asiste no simu Amu Papa Francisco nia vizita, iha Faról, segunda ne’e.
Iha lian husi sarani sira-nia lian hakilar be semo aas hanesan banin nia lian halerik ne’e, hanesan lian grasa ida-nian be semo husi tolun ida ba tilun ida seluk hodi bele sente dame, hadomi malu, toleránsia, respeita liberdade relijiozu no promove fraternidade umana entre relijiaun sira.
Aleinde ne’e, sarani Mateus da Crus, sente kontente tebes ho bensaun Papa Francisco nian bele lori grasa oioin ba nia, ba nia família inklui povu Timor-Leste tomak.
“Sente kontente tebes. Tanba, primeira-ves, iha ha’u-nia moris haree Amu Papa ida-ne’e sei la repete tan. Ho bensaun ohin ne’e, sente hanesan grasa ida,” nia dehan.
Entretantu, Maria Amaral, ho idade 12, nu’udár estudante hetan bensaun husi Amu Papa nian ne’e bele haraik grasa lori susesu iha futuru.
Notísia Relevante: Dili hakmatek hein Santu Padre Papa Fransisco
Jornalista : Nelson de Sousa
Editór : Cancio Ximenes
